Orta küz ayınıñ 30-nda Nyü-Yorkta Birleşken Milletlerniñ gumanitar işler idaresiniñ (OCHA) desteginen Ukrainadaki gumanitar vaziyetke dair BMniñ aza memleketleriniñ vekilleri içün brifing olıp keçti.

Tedbirde Ukrainanıñ BMdeki daimiy temsilcisi Serhiy Kıslıtsâ ve başqa memleketlerniñ temsilcileri iştirak ettiler.

Onlayn brifingge vaqtınca işğal etilgen topraqlarnıñ reintegratsiya meseleleri naziriniñ muavini Oleksiy Bruslık ve Ukrainada BMniñ rezident-idarecisi Matyas Şmale qoşuldılar.

Öz çıqışı vaqtında Oleksiy Bruslık halqara ortaqlarına Rusiye istilâsı sebebinden yüz bergen gumanitar buhranı al etmek içün Ukraina tarafından alınğan tedbirler aqqında aktual malümat berdi.

Ükümet adından o, gumanitar saasında ihtiyaclarnı belgiledi, 2024 ve 2025 seneleri içün Gumanitar Qarşılıq Planlarınıñ tedbirlerini maliye etmege devam etmek kerekligini qayd etti.

“Bizim içün halqara ortaqlarımıznıñ Ukrainağa Rusiye istilâsı sebebinden peyda olğan gumanitar meselelerni al etmesine yardım etmege devam etmesi pek müimdir. Bu yardım, cenkleşken yerlerden tahliye etilgen ukrainalılar içün pek müimdir. Yañı küz-qış mevsiminde cebege yaqın rayonlarnı desteklemek pek müimdir. Biz acele ve semereli cevap berip, eñ çoq muhtac olğanlarğa vaqtında ve er taraflı yardım köstermek kerekmiz”, – dep qayd etti Oleksiy Bruslık.