“Cemiyetlerniñ ğayrıdan tiklenüvi ve desteklenüvi” adlı leyha Halqara migratsiya teşkilâtı (HMT) tarafından alıp barıla. Harkiv VAM bu aqqında haber berdi.

Teşebbüs çerçivesinde Valkiv ve Berestınsk cemiyetlerinde ortaqlar gumanitar tedbirlerni kerçekleştirmege planlaştıralar. Hususan mektepler, bala bağçaları, içtimaiy ve medeniy müessiselerni tamir etecekler.

HMT bu cemiyetlerniñ sakinlerine ruhiy sağlıq saasında destek kösterecek, yerli cemaat teşkilâtlarına grantlar berecek ve yatırımlarnı celp etmek içün treninglerni keçirecek.

“Cemiyetlerniñ ğayrıdan tiklenüvi ve desteklenüvi” leyhası 42 ay devam etecek. Al-azırda o, Ukrainanıñ 25 cemaatında yerine ketirile.