Birinci hanım Olena Zelenskanıñ teşebbüsinen mektep aş sistemasınıñ islâatı çerçivesinde Birleşken Milletlerniñ Bala fondu (UNİCEF) ile umumiy orta tasil müessiselerine para yardımı köstermek içün ortaq leyha ömürge keçirile.

Leyha cebege yaqın topraqlardaki oquv yurtlarına yardım etmek maqsadınen ReNazirligi tarafından idare etile. Söz 2024/2025 oquv yılında umumiy orta tasil müessiselerine para berüv aqqında kete.

Bu leyhanıñ muzakeresi Ukraina Prezidentiniñ Ofisiniñ yolbaşçısınıñ muavini İrına Vereşçuknıñ reberliginde keçirilgen oturışta olıp keçti.

ReNazirligi tarafından Tasil ve ilim nazirliginen beraber işlenip 2024 senesi berim ayınıñ 26-da çıqarılğan Nazirler Kabinetiniñ 1114. qararında qayd etilgen kriteriylerge köre seçilgen mektepler halqara donordan 290 500 grivna miqdarında bir kerelik maddiy yardım alacaqlar. Onıñ yardımınen mektep aşhanelerini tamirlemek ve zemaneviyleştirmek, em de qış devrine azırlanmaq mümkün olacaq.

Oturış devamında Tasil nazirliginiñ vekili bu programma boyunca maliyetlendirilecek müessiselerni seçip aluv neticeleri aqqında haber etti. Böyleliknen, aşağıdakiler yardım alacaqlar:

– Dnipropetrovsk, Donetsk, Zaporijjâ, Luhansk, Mıkolayiv, Odesa, Sumı, Çerniğiv, Harkiv ve Herson vilâyetleriniñ cebege yaqın toptaqlarındaki 550 müessise;

– başqa bölgelerdeki 70 müessise, anda tasil oflayn ya da qarışıq şekilde keçirile ve içki köçkenler arasından eñ azdan 50 bala oquy;

– 80 mektep, olar cemaatlarda oflay künlik ya da qarışıq şekilde tasil bergen yekâne müessisedir.

Episi olıp 700 oquv yurtu maddiy yardımnen qaplanacaq. Şimdiki vaqıtta Tasil nazirligi paralarnı köçürmek içün kerek olğan bütün malümatnı toplay ve umumiyleştire.

İrına Vereşçuk yerli memuriyetlerni Tasil nazirligine kerekli malümatnı almasını tezleştirmege, oquv yurtları halqara ortaqtan vaqtında yardım alsınlar dep, çağırdı.