Boş aynıñ 12-13. künleri paytahtta Mektep aşayt koalitsiyası çerçivesinde birinci Avropa bölge sammit keçirile. Prezident ofisiniñ saytında bu aqqında haber berildi.

Tedbirde Birinci hanım Olena Zelenska, Prezident ofisiniñ temsilcileri, ukrain ve Avropa elçileri ve memurları, mütehassıslar ve cemaat faalcileri, em de 20-den çoq halqara teşkilâtnıñ temsilcileri iştirak eteler.

Umumen körüşüvge dünyanıñ çeşit memleketlerinden tahminen 500 iştirakçi keldi. Olarnıñ arasında BMniñ Dünya aşlıq programması, Ukrainadaki Dünya sağlıq teşkilâtınıñ ofisi, UNICEF, BMniñ İnkişaf programması ve Dünya bankınıñ temsilcileri bar.

Esas mevzusı — Ukrainada ve Avropada mektep talebeleri içün keyfiyetli aşayt.

Birinci hanım Olena Zelenska qayd etti ki, sammit memleketimiz içün mektep aşaytınıñ inkişafı boyunca halqara teşebbüslerge qoşulması ve onıñ tarafından teşebbüs etilgen islâatnıñ amelge keçirilmesi yolunda müim bir adımdır.

Baş nazir Denıs Şmığalnıñ aytqanına köre, mektep yemekleri islâatı müimdir, çünki cenkten soñ memleketniñ ğayrıdan tiklenüvi ve inkişaf strategiyasınıñ esas elementlerinden biridir.

Tedbirniñ iştirakçilerine mektep aşayt islâatınıñ esas maqsatları taqdim etildi. Bular arasında yemekhane astyapılarınıñ yañartılması, ihtisaslı hadimlerniñ inkişafı ve sağlam aşnıñ populârlaşması.

Anda yerli seviyede mektep aşaytı islâatlarınıñ amelge keçirilmesi de muzakere etile. Hususan, bu esnasta cemiyetlerniñ rolü üzerinde laflar ola.