Boş aynıñ 18-19. künleri paytahtta gumanitar diplomatiya meselelerini muzakere etecek forum keçirilecek.

Tedbirde devlet akimiyet organlarınıñ vekilleri, yetekçi gumanitar teşkilâtlar, halqara müessiseler, halq mebusları, diplomatlar, studentler ve 18-30 yaşındaki genç mütehassıslar iştirak eteler.

Forumnıñ iştirakçilerine hoş keldi sözünen UPOniñ reisiniñ muavini İrına Vereşçuk muracaat etti.

O, halqara gumanitar teşkilâtlarnıñ vekillerine Ukrainağa yardım etkenleri içün teşekkür bildirdi.

Tedbirniñ mevzulı munaqaşalarınıñ diqqat ortasında – gençlerni Ukrainada ve dünyada kelecekte gumanitar diplomatiyanıñ şekillenmesinde iştirak etüv meselesidir.

Programmada aşağıdaki mevzular muzakere etilecek:

• gumanitar diplomatiyada diplomatik missiyalarnıñ rolü;

• gumanitar deñişmeler içün çoq taraflı diplomatiyanıñ imkânları;

• şahsiy ve açıq diplomatiya ve gumanitar areketlerde kommunikatsiya strategiyaları;

• silâlı çatışma vaqtında gumanitar diplomatiyanıñ bir ifadesi olaraq halqara gumanitar uquqı.

Gençlik diplomatik forumı Danimarka, Britaniya ve Norvegiya Qızıl Haçlarınen işbirlikte Ukraina Qızıl Haç Cemiyeti tarafından teşkil etildi.

“Yañı gençlerimizniñ gumanitar diplomatiya ve halqara uquq qorçalayıcılıqnen oğraşqanları pek yahşı. Bu pek büyük bir resurs. Biz bunı er alda destekleymiz. Prezident Ofisi adından eminliknen ayta bilem ki, bütün iş teşebbüsleri ve leyhalar desteklenecek”, – dep qayd etti İrına Vereşçuk.