Bugün Kropıvnıtskıy şeerinde Mahsus vaziyetlerde habersiz ğayıp olğan kişiler meseleleri vekili Oleh Kotenko, idare merkezini açtı. Krıvıy Rih şeerinde de aynı çalışmağa başladı.

Vekiliniñ Ofisi ve Kropıvnıtskıy şeerine tahliye etilgen Donetsk devlet içeri işler universitetiniñ işdeşligi neticesinde bu mümkün oldı.

Körüşüv vaqtında yüksek tasil müessisesiniñ rektorı Serhiy Vitsitskıy, oquv yurtunıñ Ofiske ve qıdıruv faaliyetine yardım etmege, esirler ve habersiz ğayıp olğan kişilerniñ ailelerini destek etmege azır olğanını bildirdi. Şu cümleden, uquq qorçalayıcı, gumanitar ve malümat saalarında.

Aynı zamanda Oleh Kotenko, yüksek oquv yurtuna işdeşlik imkânı içün teşekkür bildirdi.

“Mütehassıslar, bu işniñ me qadar zor olğanını bileler. O, tafsilâtlarğa diqqatnı, cesür ve yaqınlarını qıdırğan ya da beklegen insanlarğa hassaslıqnı talap ete. Qıdıruv ceryanına ne qadar çoq kişi qoşulsa, o qadar çabik netice alırmız”, – dep Oleh Kotenko tecribesini añlattı.

Şimdi Ukrainada endi 14 idare merkezi: Kıyiv, Dnipropetrovsk, İlbav, Rivne, Ternopil, İvano-Frankivsk, Mıkolayiv, Vinnıtsâ, Hmelnıtskıy, Sumı, Odesa vilâyetlerinde, Kropıvnıtskıy, Krıvıy Rih şeerlerinde ve Zaporijjâ vilâyetinde çalışa. 

Hatırlatamız ki, Mahsus vaziyetlerde habersiz ğayıp olğan kişiler meseleleri vekiliniñ sıcaq hattı çalışa: 0 800 339 247. Raatlıq künleri ise Viber ve Telegram qullanımlarına (095) 896-04-21 telefon nomerasına beyanat yazıp yollamaq mümkün. Bundan ğayrı, habersiz ğayıp olğan kişiler aqqında tamam Vekilge haber bermek mümkün: (099) 792-01-26.