“Rus barışığı” kelgen soñ Ukrainanıñ vaqtınca işğal etilgen bir qaç vilâyetiniñ topraqlarındaki ayat tamam böyle körüne. Bugün Lugansk ve Herson vilâyetleri aqqında yañı haberler bar.

Aprel ayınıñ 14-ünde 

LUGANSK VİLÂYETİ

38 meskün yer gaz teminatısız qaldı – 30 tamamınen ve 8 qısmen. Umumen bu, 109 biñden ziyade abune.

32 meskün yerde elektrik kesildi – 20 tamamınen ve 12 qısmen. Bu, 103,5 biñden ziyade qullanıcı.

“Lisova daça” suv pompası stantsiyasınıñ viran etilgeninden ve “GTV” ve “Sumişçena” SPSnıñ bozulğanından Lısıçansknıñ cenübiy qısmı suvsuz qaldı. Faal arbiy areketler sebebinden onı yañıdan tilkemek mümkün olmay.

Resmiy malümatqa köre, Lugansk vilâyetiniñ 30 biñden ziyade sakini evinden telükesiz bölgelerge tahliye etmege mecbur qaldı. Resmiy olmağan raqamlar daa büyük.

Ukrainanıñ başqa vilâyetlerine ve çet memleketlerge deyerli 13 biñ bala çıqtı. Rus ordularınıñ nezareti astında vaqtınca olğan cemaatlarda 160tan ziyade mektep bar. Cenkten evel anda 22,6 biñ talebe oquy edi. Şu anda oquv ceryanı toqtatıldı.

HERSON VİLÂYETİ

Vilâyetindeki içtimaiy-gumanitar vaziyet zor qala. Şu anda vilâyetiniñ 106 meskün yerinde elektrik ve suv temşnatı yoq. Umumen bu, 64,7 biñ abune. Herson ve Berıslav rayonları ve cebege yaqın olğan bir qaç meskün yer eñ çoq zarar köre.

18,7 biñ kişi gazsız qaldı. Olarnıñ çoqusı, Stanislav birleşken territorial cemaatınıñ ve Berıslav rayonınıñ 16 meskün yeriniñ sakinleri.

Daa 754 mesken ev, onlarca mektep ve bala bağçası ya viran etildi ya da bozuldı.

Velıki Kopani qasaba territorial cemaatınıñ yerli mektebiniñ esasında işğalciler, 200 şahsiy terkipli arbiy komendaturanı yaratalar.

Diqqatıñıznı celp etemiz ki, dercde Lugansk ve Herson vilâyet arbiy memuriyetleriniñ resmiy veb menbalarından ve matbuat merkezinden alınğan malümat qullanıldı. Şu anda nezaretimiz astında olmağan topraqlardaki vaziyetke dair tolu ve doğru isaiyat bermek imkânsızdır.