Tünevin vitse baş nazir İrına Vereşçuk, Ukrainadaki Azerbaycan Cumhuriyetiniñ Vekâletli ve Salâhiyetli elçisi Seymur Mardaliyevnen körüşti.

Ükümetniñ 2020 senesi bozarğan aynıñ 17-sindeki 503. qararına mücibi Ukraina vitse baş naziri İrına Veeşçuk, Ukraina-Azerbaycan birleşken ükümetlerarası iqtisadiy işdeşlik meseleleri eyyetiniñ başlarından biridir.

Taraflar, ayrıca iqtisadiy ve ticaret saalarında eki ülkeniñ kelecek işdeşligini muzakere ettiler.

Bundan ğayrı, Ukrinanıñ gumanitar destegi meselesine ayrıca diqqat ayırıldı. Azerbaycan, cenkten zarar körgen balalarğa tibbiy ve ruhiy reabilitatsiya yardımı etmege ve Ukrainanı yañıdan quruv leyhalarını yerine ketirmege devam etecek.

Şu anda Azerbaycan İrpin ve Buça şeerlerindeki astyapı obyektlerini yañıdan quruvnen bağlı beş leyhanı yerine ketire.

Bundan başqa, Baku energetika saasını yañıdan qurmağa qatılacaq. Azerbaycan Prezidenti, Ukrainanıñ ihtiyacına generatorlar ve yüksek voltlı kabellerni satın almağa üleştirilecek 7,6 million dollar ayırmaq qararını imzaladı.

Yañi işdeşlik yönelişi de azırlana –  topraqlarnıñ gumanitar minasızlaştırılmasıdır.

Körüşüv vaqtında ticaret ve iqtisadiy işdeşligini pekitmek maqsadınen ukrain ve azerbaycan biznes vekilleriniñ online oturışını keçirmege añlaştılar.

Bundan ğayrı, Azerbaycannıñ işğalden azat etilgen topraqlarını reintegratsiya ve yañıdan quruv tecribesini muzakere etmek maqsadınen eki ülkeniñ devlet müessiseleriniñ orta oturışını da keçirmege añlaştılar.

Taraflar, kelecek sene Baku şeerinde olacaq Ukraina-Azerbaycan birleşken ükümetlerarası iqtisadiy işdeşlik meseleleri eyyetiniñ 13. oturışına azırlanalar.

“Ukraina ve Azerbaycan arasında er vaqıt konstruktiv dialog ve semereli işdeşlik bar edi. Bugün bizim ülkemizge qarşı silâlı tecavuz şartlarında bu işdeşlikniñ mahsus manası bar. Şu anda eki ülke, strategik ortaqlıqnıñ daa semereli basamağına yoldadır”, – dep vitse baş nazir qayd etti.