Latin urufatı esasında bu tilniñ elifbesini qullanaraq qırımtatar tiliniñ imlâsınen bğlı leyhanı yerine ketirüv aqqında laf etemiz. Şu anda terkibine tilşınaslar ve qırımtatar halqınıñ cemaatınıñ alimleri qatılğan iş gruppası, imlânı azırlay.

Vtse baş nazir İrına Vereşçuknıñ başlığınen keçirilgen Qırımtatar tili meseleleri milliy eyyetiniñ oturışınıñ iştirakçileri bu aqqında haber berdiler.

Tedbir, Halqara ana kününe ve Qırım MC ve Aqyar şeeriniñ işğaliniñ 10. seneligine bağışlandı.

Anda Prezidentniñ QMCdeki Daimiy Temsilcisi Tamila Taşeva, Qırımtatar Milliy Meclisiniñ Başı Refat Çubarov, Devlet qavmiyat ve vicdan azatlığı hızmetiniñ (DQVAH) vekilleri ve başqa meraqlanğan taraflar iştirak ettiler.

İştirakçiler, 2022-2032 ss. Qırımtatar tiliniñ inkişafı strategiyasınıñ yerine ketirilmesiniñ başqa adımlarını da baqtılar.

Strategiya çerçivesinde DQVAH, qırımtatar tiliniñ inkişafına mahsus isse içün mukâfat aqqında qararnıñ leyhasını azırlap, Ükümetke yolladı. Şu cümleden, er sene 50 biñ grivnalıq 20 mukâfat, diplom ve köküs tamğası berilecek.

Bundan ğayrı, vaqtınca işğal etilgen Qırımnıñ toponimleri meselelerine diqqat celp etildi. Şu anda haritalar ve yol işaretlerinde toponimlerni latin urufatında yazmağa imkân berecek mehanizmler baqıla.

İştirakçiler, Qırımda qırımtatar halqınıñ ana tilinde oquv aqqı bozmasını da muzakere ettiler. Çünki işğal memuriyeti, qırımtatar mektepleri ve sınıflarını tapataraq, bu imkândan marum etmemeli.

“Bizim prioritetimiz, qırımtatar tilini saqlamaq ve inkişaf ettirmektir. Ve Ükümet olaraq biz, tilni saqlamağa yönelgen teşebbüslerniñ yerine ketirilmesi içün er şey yapmalımız. Bütün meraqlanğan taraflarnı bu ceryanğa qatılmağa çağıram. Beraber biz, qırımtatar tiliniñ ğayıp olmaması içün er şey yapacaqmız. Onıñ inkişafı, Ukraina içün müimdir”, – dep İrına Vereşçuk qayd etti.