Ukraina Vitse baş naziri İrına Vereşçuknıñ yardımınen ve Ukrainadaki Qırmızı Haç Teşkilâtınen beraber “Azovstal”nıñ sığınaqlarından tahliye etilgen 20 mariupollı bugün Zaporijjâdan İvano-Frankivsk vilâyetine ketti.

Ukrainadaki Qırımızı Haç Teşkilâtı, vatandaşlarımız içün ketecek yerge naqliyatnı tamamınen ödedi.

Şimdi anda endi 46 mariupollı buluna. Eki aydan ziyade vaqıt devamında ateşler astında, normal aşsız, suvsız ve kerekli eşyasız yaşağan vatandaşlarımız içün ruhiy reabilitatsiya keçirile. Bu, insanlarğa ruhiy sağlığını yañartmağa, sakin ve tınç bir yerde daa küçlü olmağa yardım etecek.

Aynı zamanda Ukrainanıñ vaqtınca işğal etilgen topraqlarınıñ reintegratsiya meseleleri nazirligi, şu anda Bukovınada bulunğan mariupollılarnı kerekli er şeynen temin etmek içün elinden kelgeni er şey yaptı. Bu cümleden, insanlar urbanen, gigiyena eşyalarınen ve azıq mahsulatınen temin etildi.

Bundan ğayrı, yerli icra akimiyet organlarınıñ vekilleri, insanlarğa devlet para yardımını, tibbiy ve tasil hızmetlerni almaq içün arizalarnı, DAK malümatnamesini ve diger kerekli vesiqalarnı acele tarzda vesiqalaştırmağa yardımcı oldılar.

Tahliye etilgen sakinlerinen iş devam ete. Reintegratsiya nazirligi olarğa er taraflı tarzda desket ve yardım etecek.