Donetsk, Harkiv ve Herson vilâyetleriniñ işğalden azat etilgen topraqlarında noyabr ayı içün pensiyalar ödenmege başladı. Olar em Ukrpoşta, em de vekâletli banklar vastasınen ödene.

Noyabr ayında Donetsk vilâyetiniñ işğalden azat etilgen topraqlarında Ukrpoşta, Lıman ve Svâtohirsk topraq cemiyetleriniñ ayrı meskün yerlerine pensiyalarını ketirmek içün tehnikiy imkânlarını yañıdan yarattı. Bundan ğayrı, Svâtohirsk ve Lıman şeerlerinde, Yarova, Novoselivka qasabalarında, Yatskivka ve Lozove köylerinde Ukraina Pensiya Fondunıñ işçileri, vatandaşlarnı almaq içün mobil taqımlarnı teşkil ettiler.

Sentâbr – noyabr ayları devamında Harkiv vilâyetiniñ işğalden azat etilgen topraqlarında Ukraina Pensiya Fondunıñ 9 hızmet merkezi yañıdan çalışmağa başladı. Şu cümleden, Balakliya, İzüm, Barvinkove, Vovçansk, Kupyansk ve Derhaçi şeerlerinde, Çkalovske, Şevçenkove ve Velıkıy Burluk qasabalarında.

Hatırlatamız ki, Herson vilâyetindeki işğalden azat etilgen 72 meskün yerge Ukrpoşta pensiyalarnı ketirmek imkânını yañıdan yarattı. Bundan ğayrı, Novovorontsovka qasabasında Ukraina Pensiya Fondunıñ hızmet merkezi yañıdan çalışmağa başladı. Daa Vısokopillâ ve Velıka Oleksandrivka qasabalarında vaqtınca abadanlaştırılğan iş yerlerinde hızmet merkezleriniñ mütehassısları vatandaşlarğa hızmet eteler ve işğalden azat etilgen başqa meskün yerlerde yaşağan vatandaşlarğa mobil taqımlar yardımınen hızmet bereler.