Vitse-baş nazir – Ukrainanıñ vaqtınca işğal etilgen topraqlarınıñ reintegratsiya meseleleri naziri İrina Vereşçuk, mart ayınıñ 11-indeki gumanitar koridorlarnıñ işiniñ neticeleri aqqında añlattı.

Böylece:

•  İzüm-Lozova (Harkiv vlt.) yönelişinde avtobuslarnı yollap olmadıq – Lozovağa qaytmağa mecbur oldı.

«Rus orduları ateş bitirme rejimine riayet etmeyerek İzüm şeerine kelgen yolunı mina topularınen ateşke tuttılar. Yazıq ki, şimdi ealiniñ tahliyesi ve gumanitar yükni ketirmesi olmaz», – dep Vereşçuk qayd etti.

•  Andriyivka ve Mıkulıçın köylerinden Jıtomır şeerine marşrutında işğalciler Nemişayeve köyündeki blok noqtasında 12 avtobusnı toqtatıp döndürdiler. Onıñ sözlerine köre, insanlarnıñ tahliyesi içün avtobus sırasını keçirmek emri yoq edi.

«Men qayd etem: bu kerçek olmay! Bu marşrut qayd etildi, ve Qırmızı Haç, ruslarnıñ bu yönelişte gumanitar koridornı açmaq razısını bildirgeni cevapnı azırladı», –  dep Vitse nazir qayd etti.

•  Makariv şeerinden ve Borodânka şeerinden (Kıyıv vlt.) Jıtomır şeerine Rusiye tarafından ateş bitirme rejimi bozuldı. İnsanlar tahliye etilmedi.

•  Mariupol şeerinden Zaporijjâ şeerine tahliye de kerçekleşmedi.

 «Yarın Mariupoldan insanlarımıznı daa bir kere tahliye etmege tırışacaqmız. Ve yañıdan bunı bütün dünya ve siyasetçiler ögünde yapacaqmız. Çünki jurnalistler, papazlar olacaq. Yarın epimiz, bütün Ukraina anda olacaqmız – tahliyeniñ nasıl olacağını qasevet, nezaret etecek. Birinciden gumanitar yükni yollamağa ve bundan soñ insanlarnnı tahliye etmege planlaştıramız. Yarın er kesni bu vaqianı aydınlatmağa ve bu gumanitar koridorğa diqqat ayırmağa rica etem, çünki Mariupolda şimdi vaziyet eñ qıyındır», –  dep İrina Vereşçuk çağırdı.

•  Donetsk vilâyetiniñ Volnovaha şeerinden Pokrovsk şeeriniñ yönelişine tınç yaşağan ealini tahliye etemedik.

•  Aynı zamanda, Kıyıv vilâyetindeki çoq zarar körgen şeerler ve qasabalarnıñ sakinlerini tahliye etip becerdik: Vorzelden biñden ziyade insan, Buça, Gostomel ve Kozarovıçiniñ sakinleri.

«Yarın gumanitar koridorlar üzerinde çalışmağa devam etecekmiz. Er şey istegenimiz kibi ve o qadar çabik olmay. Amma ukrain akimiyeti, bu müim mesele üzreinde israrlıqnen ve toqtamağan tarzda çalışmaqta. Daa bir kere qayd etmege isteyim: Rusiye, gumanitar koridorlarnı açmağan ve bütün eveldeki añlaşmalarnı bozğan eñ müim bir faktordır», – dep Nazir hulâsa çıqardı.