Saba brifingi vaqtında Vitse baş nazir – Ukrainanıñ vaqtınca işğal etilgen topraqlarınıñ reintegatsiya meseleleri naziri İrina Vereşçuk, mart ayınıñ 15-indeki gumanitar koridorlarnıñ iş planlarını añlattı. Umumen 9 böyle koridor tasdıqlandı.

Umumen, bloklanğan şeerniñ sakinleriniñ çoq beklegeni yüzlerce tonnalıq suv, ilâçlar, azıq mahsulatınen gumanitar yük Berdânsktan Donetsk vilâyetindeki Mariupolğa ketecek. Qaytqanda ise o, qadınlarnı, balalarnı ve Mariupol-Zaporijjâ marşrutında tahliyege ihtiyac duyğan er kesni alıp ketecek.

• Kıyıv vilâyetinde, közde tutqanımız kibi, Boğdanivka ve Nova Bodanivka köylerinde ve Bobrık köyünden Brovarığa tahliye marşrutı işleycek.

“İvankivdeki balabam meseleni bilemiz ve bu marşrut üzreinde çalışamız. Endi yarın böyle gumanitar koridornı aça bilecegimizge can-yürekten ümüt etem”, – dep İrina Vereşçuk paytaht bölgesindeki eñ büyük mesele olğan tahliye yönelişini qayd etti.

• Sumı vilâyetinde Sumı, Trostânets, Lebedın, Şostka ve Konotop şeerlerinden Poltavağa gumanitar koridor açacaq.
• Harkiv vilâyetinde Oskop köyünden Slovânskqa tınç yaşağan vatandaşlarnıñ tahliyesi planlaştırılır.

“İnandırmağa isteyim: Facebookta, başqa ağlarda bergeniñiz bütün malümat bizge kete. Onı işleymiz ve iç kimseni qalmamağa söz beremiz. Biz hatırlaymız, bilemiz ve sizni qurtarmağa pek isteymiz! Birlikte olayıq, bir-birimizni saqlap tutayıq, Ukrainanı qorçalayıq!” – dep İrina Vereşçuk aktiv arbiy areketlerniñ telükesiz rayonlarından ketmege yardım etmege rica etken vatandaşlarğa destek sözünen muracaat etti.