2021 s. noyabr ayınıñ 17-sindeki oturışta Ukraina Nazirler Kabineti, 2018 s. noyabr ayınıñ 7-sindeki № 417/2018 «Levko Lukyanenko adına devlet stipendiyaları aqqında» Prezidentniñ Emrini yerine ketirmek içün «Levko Lukyanenko adına devlet stipendiyasınıñ berilmesi» aqqında Prezidentniñ Emriniñ leyhasını taqdirledi.

Böylece, Ükümet, Ukrainanıñ suverenitetini ve territorial bütünligini ğayrıdan tiklemesi içün içtimaiy ya da siyasiy faaliyeti sebebinden bu zamanğa qadar vaqtınca işğal etilgen topraqlarda qanunsız olaraq Rusiye Federatsiyası ve işğal ükümeti tarafından tevqif olğan daa bir ukrain – Vladıslav Yesıpenkoğa Levko Lukyanenko adına stipendiyanı bermege dair Prezidentniñ Emriniñ leyhasınıñ taqdirlenmesi aqqında qarar berdi.

Vladıslav Yesıpenko, Qırımnıñ içtimaiy ve ekologiya meselelerini aydınlatqan «Radio Svobodanıñ» ştattan tış jurnalisti, 2021 s. mart ayınıñ 10-unda tamam Taras Şevçenkonıñ doğğan kününe dair tedbirden soñ qanunsız olaraq azatlıqtan marum etildi. Vladıslav Yesıpenkonıñ tevqifiniñ qanunsız olğanını ve siyasiy avesliligi aqqında yabancu ve ukrain resmiy teşkilâtlarınıñ ve uquq qorçalav şirketleriniñ vekilleri tekrar-tekrar fikrini ayttılar.

Üç yaşayış azğarınıñ miqdarındaki stipendiya qanunsız olaraq tevqif olğan vaqtında ve azat etken bir sene devamında berilmektedir.

Reintegratsiya nazirligi tarafından azırlanğan ve Ükümet tarafından tasdıqlanğan Prezidentniñ Emriniñ stipendiya berme leyhası Ukraina Prezidentniñ baqıluvına berilecek. Niaiy qarar bergen soñ Reintegratsiya nazirligi kerekli ödevlerni temin etecektir.

Qoşma malümat. Levko Lukyanenko adına devlet stipendiyası, bu kişilerniñ içtimaiy ya da siyasiy faaliyeti sebebinden Donetsk ve Lugansk vilâyetlerindeki ve Qırım Muhtar Cumhuriyetindeki vaqtınca işğal etilgen topraqlarnı kontrol astında tutqan Rusiye Federatsiyası ya da RF işğal memuriyeti tarafından qanunsız olaraq tevqif olğan ukrain vatandaşları içün er ay üç yaşayış azğarınıñ miqdarında teyinlenmekte.