Belli olğanı kibi, Vitse baş nazir – Ukrainanıñ vaqtınca işğal etilgen topraqlarınıñ reintegratsiya meseleleri naziri İrina Vereşçuk, Arbiy esirlernen tutma meseleleri koordinatsiya ştabınıñ reberi oldı. «Şimdiki zaman» («Настоящее Время») telekanalınıñ canlı yayınında bu müessiseniñ yañı areket saasınıñ bazı hususiyetlerini añlattı.

İrina Vereşçuk haberdar etti ki, şimdi USQniñ muvafaqiyetli arbiy areketleri neticesinde daa çoqlaştırılğan rus arbiy esirlerinen kerçeklikke uyğun bir çalışma sistemasını yartamağa izin berecek yañı bir normativ-uquqiy temel azırlanmaqtadır.

“İstegenimiz kibi bizde er şey o qadar azır degil, amma biz pek tez çalışamız. Şimdi Rusiye susa ve bizim askerlerimizniñ qayda olğanı aqqında malümat bermey. Bizde bukunğan esirlerge ise Qırmızı Haçqa yol berdik. Olar intervyü bereler, olarğa baqalar, yani er şey Cenevre şartnamesine uyğundır. Rusiye, elbette, bu qaidelerni boza”, – dep Vitse baş nazir, yañı rutbede ilk adımlerını añlata.

İrina Vereşçuknıñ sözlerine köre, rus arbiy esirleri normal şaraitte mahsus kameralarda tutulmaqta. Böyle degen “ihtisasiy küreşçiler” arasında kerçekten 2002 ve 2003 senesi doğğan balalarnıñ olğanı eñ çoq şaşıra. Putin ve Şoyğu olarnı tamam ölümge yolladılar.

“Men Rusiyeniñ analarına muracaat etmege isteyim. Balalarıñıznıñ yaqında Belarus ve ya Qırımğa  oqumağa kelgenlerini tüşünesiñiz. Aslında olar esirligimizdedir. Ve bu zabitler degil, yaş askerlerdir. Ve bu da cinayettir. Balalar tamam ölümge yollanmaz. Olarnıñ ne yapqanlarınıñ yarısını da bilmey ediler. Bütün bu ciyanetler, ukrain vatandaşlarını, qadınlarnı ve balalarnı öldürmek içün Rusiyeden balalarnıñ mına kelmesini emredenlerge qarşı açılacaq makemelerniñ temelini teşkil etecek”, – dep Reintegratsiya nazirliginiñ reberi öz nazar noqtasını bildirdi.