2021 s. noyabr ayınıñ 25-inde Vitse-baş nazir – Ukrainanıñ vaqtınca işğal etilgen topraqlarınıñ reintegratsiya meseleleri naziri İrina Vereşçuk, Ukrainadaki Halqara Qırmızı Haç komitetiniñ Missiyasınıñ başı Florans Jillettnen körüşti.

Taraflar, gumanitar saada işdeşlikni, bu cümleden Ukrainanıñ kontrolı astında olmağan topraqlarda azatlıqtan marum etilgen kişilerge irişimni muzakere ettiler. İrina Vereşçukniñ söylegenine köre, Halqara Qırmızı Haç komitetiniñ Missiyasınıñ yardımınen, Donetsk ve Lugansk vilâyetleriniñ vaqtınca işğal etilgen topraqlarında qanunsız olaraq tevqif olğan ukrain vatandaşlarınıñ azat etilüvinen bağlı meselelerniñ halqara meydançıqlarda er vaqıtki köterilmesi, ukrain vatandaşlarınıñ aqları ve olarnıñ eñ yaqın zamanda azat etilmesi içün küreşke imkân yaratacaq.

Bundan ğayrı, Ukrainanıñ Vitse-baş naziri, şimdi işğal etilgen topraqlardaki apishanalerge közetüv züyaretlerini keçirmesi ve vatandaşlarımıznıñ bozılğan aqlarını yañıdan tiklemesi ve olarğa kerekli tibbiy yardımnı bermesi içün Ukrainadaki HQHKne imkân bermesine dair faal işniñ yapılğanını qoştı.

HQHKniñ bütün tevqif olğan kişilerge irişiminiñ berilmesiniñ 2019 s. dekabr ayında Normand formatındaki Paris sammitiniñ mecburiyetlerinden biri olğanını qayd etemiz. İşğal memuriyetiniñ areketleri, halqara aqnıñ, bu cümleden 1949 s. avgustnıñ 12-sinde qabul etilgen cenk vaqtında grajdan ealisiniñ qorçalanması aqqında Cenevre konventsiyasiniñ qaidelerini bozmaqtadır.

HQHKniñ işiniñ daa bir müim bir saası, habersiz ğayıp olğanlarnıñ qıdırıluvı ve olarnıñ qorantalarına yardım etüvdir. HQHKniñ bu saadaki tecribesi Ukraina içün pek müimdir. Resmiy malümatqa köre, 800-den ziyade kişi, Donbasstaki çatışuv netecesinde habersiz ğayıp olğan olaraq sayılmaqtadır. Asında, bu raqam çoq daa yüksek ola bile.

Körüşüvniñ soñunda Vitse-baş nazir – Ukrainanıñ vaqtınca işğal etilgen topraqlarınıñ reintegratsiya meseleleri naziri İrina Vereşçuk, kelecek faal dialogğa ve vaqtınca işğal etilgen topraqlarda ukrainalılarnıñ aqlarını qorçalama saasında işdeşligini quvetleştirmek içün Reintegratsiya nazirliginiñ Ukrainadaki Halqara Qırmızı Haç komitetiniñ Missiyasınen küç-quvetini birleştirmege azır olğanını bildirdi.

Qoşma malümat. Ukrainadaki Halqara Qırmızı Haç komiteti, halqara gumanitar aq aqqında bilgilerni tarqatmaqta, oña riayet etüvini kontrol eterek ve çatışuv vaqtında taraflarğa olarnıñ mecburiyetlerini hatırlataraq milliy seviyede onıñ kirsetilmesine yardım etmekte. UKrainada HQHK, Şarqiy Ukrainadaki çatışuv neticesinde zarar körgen insanlarğa ve Ukraina Qırmızı Haç şirketiniñ işine yardım etmektedir.