Ukrainanıñ vaqtınca işğal etilgen topraqlarınıñ reintegratsiya meseleleri nazirliginiñ Ekspert şurası, RF silâlı tecavuzı devamında olğan insan aqlarınıñ ve halqara gumanitar aqlarınıñ bozulmasını vesiqalaştıruv ve közetüv devlet sistemasınıñ yaratıluvına dair leyhanı taqdim etti.

«Vazifemiz, vesiqalaştıruv usulşınaslığını işlep çıqarmaq, böyle bir baza içün talaplarnı yazmaqtır. Malümatnı toplağan, talil etken ve tertipke ketirgen bu programma vesiqasını farqlı devlet organları qullana bilecekler. Olarnen beraber biz, iş muzakeresini keçiremiz ve fikirni yerine ketirmek içün er kesniñ öz parçasında talaplarnen ve beklevlernen paylaşacağı kommunikatsiya bir platformasını yaratmaq kibi vazifemiz bar. Elbet, bu malümat bazasını yaratuvğa uquq qorçalav organlarından bizim işdeşlerimiz de qoşulacaq», – Reintegratsiya nazirliginiñ Barışıq inkişafı milliy merkeziniñ başı Oleksandr Smirnov dep bildirdi.

Taqdim etüv, Ukrinform haber agentliginniñ binasında keçirildi. Reintegratsiya nazirligi ve insan aqları Ukraina Helsinki birligi teşkil etüvde ortaqlar oldılar. Daa tedbirge Qırım Muhrat Cumhuriyetindeki Prezident Vekilliginiñ murahhası Sergiy Skrıpnık, Truth Houndsnıñ eksperti Roman Avramenko ve Şarq SOS, Qırım uquq qorçalav gruppası kibi cenk devamında insan aqlarınıñ bozulmasını vesiqalaştırğan uquq qorçalav teşkilâtları qoşuldı.

2021 s. iyül ayında Reintegratsiya nazirliginiñ emrinen, RF silâlı tecavuzı devamında olğan insan aqlarınıñ ve halqara gumanitar aqlarınıñ bozulmasını vesiqalaştıruv ve közetüv devlet sistemasınen oğraşqan Ekspert şurasınıñ teşkil etilmesini hatırlatamız. Onıñ terkebinde Ukrainanıñ topraqlarında çalışqan akimiyet devlet organlarınıñ ve bütün uquq qorçalav teşkilâtlarıñ vekilleridir.