Bugünden, 2021 s. dekabr ayınıñ 15-inden başlap, Ukrainaniñ vaqtınca işğal etilgen topraqlarınıñ reintegratsiya meseleleri nazirligi tarafından teşkil etilgen Ukraina milliy barışıq inkişafı merkezi çalışmağa başlay.

Tedbir, Vitse-baş nazir – Ukrainanıñ vaqtınca işğal etilgen topraqlarınıñ reintegratsiya meseleleri naziri İrina Vereşçukniñ, adliye naziri Denis Malüskaniñ, insan aqları, işğalden azat etme ve reintegratsiya meselelerinen bağlı Ukraina Yuqarı Şurasının Eyyetiniñ başı Dmitro Lubinetsniñ iştiraginen kerçekleştirildi.

Yañı merkezniñ maqsadı, barışıq inkişafı, silâlı tecavuz neticelerini aşma ve insanlarnıñ aqlarını, halqara uquq qaidelerini ve RF silâlı tecavuzı neticesinde zararnı nezaret etme ve vesiqalaştırma saasında areketlerni koordinatsiya etmektir.

«Bu Merkezniñ felsefesi, tamam barışıq inkişafında eñ müim olğan eki sözden – adaletlilikni yañıdan tikleme ve VİETdan insanlarnıñ işançı – ibarettir», – dep İrina Vereşçuk qayd etti.

O, Reintegratsiya nazirliginiñ endi yañı Merkezniñ çalışacağı bir qaç azırlavı ve yönelişiniñ olğanını de bildirdi. 2022 sesensi, Merkezniñ şekillenüv, toldurulması, aletlerniñ qıdırılması, hususan bücetten tış, devri olacaqtır.

Bu meseleni çezmesi içün vitse-baş nazir, Merkezniñ teşkil etmesine qoşulğan halqara teşkilâtlarnıñ yardımına ümüt ete.

«Men, Ukraina Prezidenti Volodımır Zelenskiyge teşekkür bildirmege isteyim, çünki onıñ siyasiy isteginen Ukraina milliy barışıq inkişafı merkezini teşkil etme ğayesi endi kerçekleştirildi. Daa Ukraina Baş naziri Denis Şmıgalge sağ ol aytam, çünki o, Ükümetniñ başı olaraq, merkezni açması içün kerekli adımlar yaptı. Ve elbette bizim halqara, uquq qorçalav ve yerli  teşkilâtlarımızğa teşekkür bildirem. Kelecekte işdeşlik yapacağımızğa pek ümüt etemiz»,- dep İrina Vereşçuk hulâsa çıqardı.

«Ukraina milliy barışıq inkişafı merkezi» devlet şirketi, Ukraina milliy telükesizlik ve mudafaa şurasınıñ 2021 s. iyün ayınıñ 2-sindeki «Donetsk ve Lugansk vilâyetlerinde vaziyetniñ barışıq yolunen çezilmesi esnasınıñ faalleştirilüvi bazı meseleleri aqqında» qararınıñ 6 maddesiniñ 1 ast maddesini yerine ketirmesi maqsadınen Ukrainanıñ vaqtınca işğal etilgen topraqlarınıñ reintegratsiya meseleleri nazirligi tarafından teşkil etildi.