2021 s. dekabr ayınıñ 23-ündeki oturışta Ukraina Nazirler Kabineti, azat etkeni soñ Ukrainağa qarşı RF silâlı tecavuzi neticesinde azatlıqtan marum etilgen kişilerniñ içtimaiy ve uquqiy qorçalanması yol-yoruğını mükemmelleştirgen qararnı qabul etti.

Evelce esirlikten azat etilgen vatandaşlar, devletten para yardımını tek azat etkenleri soñ Ukraina telükesizlik hızmetiniñ cedveline kirsetip ala bile ediler. Ükümet, Ukrainağa qarşı RF silâlı tecavuzi neticesinde azatlıqtan marum etilgen kişilerniñ içtimaiy ve uquqiy qorçalanması yol-yoruğından bu maddeni çıqardı.

Böylece, mezkür idarelerarası eyyet, 2014 senesinden başlap esirlikten azat etilgen kişilerniñ bütün arizalarını baqa bilecek.

«Bu deñişmeler yapıp, biz UTHniñ cedvelinden siyasiy esirlerimizniñ uquqiy statusını «çıqardıq». Ükümetiniñ qararı esnaslarnı qolaylaştırır ve olarnı daa aqlı yapar. Bu qarar üzerinde çalışqan er keske teşekkür bildirem», – dep Vitse-baş nazir – Ukrainanıñ vaqtınca işğal etilgen topraqlarınıñ reintegratsiya meseleleri naziri İrina Vereşçuk bildirdi.

Reintegratsiya nazirligi qanunlarnı mükemmelleştirmek, vatandaşlarnıñ  aqlarınen meselelerni ögretip çezmek içün çalışmağa devam ete.

2021 senesi içinde Ukrainağa qarşı silâlı tecavuz neticesinde azatlıqtan marum etilgen insanlarnıñ tanınması ve içtimaiy qorçalamalarına yönelişli tedbirlerniñ yerine ketirmesinen bağlı meseleler üzerinde İdarelerarası eyyet 11 oturışnı keçirdi. Olarnıñ neticelerine köre, eyyet 2014 senesinden başlap rus esirliginden azat etilgen 421 kişige bir kerelik para yardımını tayin etti. 376 kişi para endi aldı, ve yaqın zamanda 43 kişi de alacaq.

Azat etkeni soñ Ukrainağa qarşı RF silâlı tecavuzi neticesinde azatlıqtan marum etilgen kişilerniñ içtimaiy ve uquqiy qorçalanması yol-yoruğı Ukraina Nazirler Kabinetiniñ 2019 s. dekabr ayınıñ 11-indeki № 1122 qararınen tasdıqlandı.