Umumen Herson, Mıkolayiv, Harkiv, Donetsk ve Luhansk vilâyetlerinde pensiya ödemek içün 12,55 mlrd grivna üleştirildi.

Dekabr ayında Ukrpoşta, Herson vilâyetiniñ işğalden azat etilgen 56 meskün yerine pensiya ödemelerini ketirme ve berme tehnikiy imkânı taptı.

Oktâbr-dekabr ayları devamında vilâyetteki Novovorontsovka, Bilozerka, Vısokopillâ, Velıka Oleksandrivka qasabalarında ve Herson şeerinde Ukraina Pensiya fondunıñ hızmet merkezleri yañıdan çalışmağa başladılar. Şu anda Berıslavda hızmet merkezini açmaq içün teşkiliy tedbirler keçirile.

Bu ay Mıkolayiv vilâyeteindeki Snihurivka şeerinde UPFnıñ hızmet merkezi yañıdan çalışmağa başladı.

Dekabr ayında Harkiv vilâyetiniñ işğalden azat etilgen 140 meskün yerine pensiya ketirme imkânı yañıdan yaratıldı.

Hatırlatamız ki, küz boyunca Harkiv vilâyetiniñ işğalden azat etilgen topraqlarındaki Balakliya, İzüm, Barvinkove, Vovçansk, Kupyansk ve Derhaçi şeerlerinde, Çkalovske, Şevçenkove ve Velıkıy Burluk qasabalarında Ukraina Pensiya fondunıñ 9 hızmet merkezi yañıdan çalışmağa başladı.

Ukraina Pensiya fondunıñ ihtisasları vatandaşlarğa hızmet etmek içün Donetsk vilâyetindeki Svâtohirsk ve Lıman şeerlerine, Yarova, Novoselivka, Oleksandrivka, Sosnove, Drobışeve ve Yampil qasabalarına, Yatskvka, Lozove, Şçurove, Derılove, Brıskivka, Starıy Karavan, Krımkı, Rubtsi, Stavkı, Dibrova, Ozerne, Krıva Luka, Şandrıholove ve Koroviy Yar köylerine keteler.

Keçken afta Luhansk vilâyetiniñ işğalden azat etilgen topraqlarında Ukrpoşta ilk kere pensiya ödedi. Anda Svativsk rayonınıñ işğalden azat etilgen 3 meskün yerine pensiya ketime tehnikiy imkânı yañıdan yaratıldı.