“Biz – Ukraina” kanalında tek haberler telemarafonı vaqtında vitse baş nazir İrına Vereşçuk bunı bildirdi. Onıñ sözlerine köre, vaqtınca işğal etilgen topraqlarda rus tecavuzcıları, insalarnı bir yerden başka yerge ketirerek soviet tecribesini qullanalar – tahliye dep sürgün eteler. Ve tarihta ukrain halqınıñ genotsid vaqiası ilk olmay. 

“Amma bu kere bu tür cinayetler yapqanları içün tamamınen mesüliyet çekecekler. Siz bilesiñiz ki, Avropa parlamenti bir rezolütsita qabul etti. Anda cenk cinayetçileri içün makeme ceryanınıñ kerekligi qayd etildi”, – dep İrına Vereşçuk ayttı.

Bundan ğayrı o, vaqtınca işğal etilgen topraqlardaki vatandaşlarnı duşmanlarğa yañlış yaptırmağa imkân bermemege çağırdı.

“Tolu miqyaslı tecavuznıñ başlanğıcında gumanitar koridorlar bar edi. Olar vastasınen Ukrainanıñ kontrol etkeni topraqlarğa yüz biñlerce insan qurtarıldı. Şu anda işğalciler koridorlarnı açmağa imkân bermeyler. Buna aksine olar içtimaiy astyapını viran eteler ve mesken rayonlarını ateşte tutalar. İnsanlarnıñ ayatlarını dayanılmaz yapalar ve böylece tek rusiyeniñ topraqlarına ketmege mecbur eteler. Bu, sürgünlik ve Jenevre şartnamesini bozmadır. Bunıñ içün daa bir kere qayd etem: sürgünlik qararını bergen memurdan insanlarımıznı ketirgen aydayıcığa qadar er kes bu cinayet içün mesüliyet çekecek”, – dep vitse baş nazir hulâsa çıqardı.