Vitse-baş nazir — Ukrainanıñ vaqtınca işğal etilgen topraqlarınıñ reintegratsiya meseleleri naziri İrina Vereşçuk, halq mebuslarınen ve profil nazirlikleriniñ vekillerinen beraber 2030 senesine qadar Donetsk ve Lugansk vilâyetleriniñ İqtisadiy inkişaf strategiyasına dair iş körüşüvini keçirdi.

«Bu sene avgust ayında Ükümet, 2030 senesine qadar Donetsk ve Lugansk vilâyetleriniñ İqtisadiy inkişaf strategiyasını tasdıqladı. Reintegratsiya nazirligi ise Donetsk ve Lugansk vilâyetleriniñ prioritetli iqtisadiy inkişaf toprağına çevirilmesi içün qanun leyhalarını azırlap çıqardı. Donbassnıñ sakinleri iş yerlerini alacaqlar ve olarnıñ yaşayış seviyesi artacaq. Devlet Donbasnıñ ğayrıdan qurulması içün qoşma para, iş adamları ve yatırımcılar ise biznes içün oñaytlı şaraitini berecek», – İrina Vereşçuk dep añlattı.

«Bugün bu bölgeni inkişaf ettirmege yardım etecek teklifler ve tevsiyeler ögrenilmekte. Ümüt etem ki, bu seneniñ soñuna qadar Yuqarı Şurada bu qanun leyhaları qayd etilecek», – dep bildirdi. 

Qoşma malümat. Donetsk ve Lugansk vilâyetleriniñ İqtisadiy inkişaf strategiyası, yerli cemiyetlernen, biznes ve halqara ortaqlarnen kilişilgen ve viran etilgen Donbassnıñ ğayrıdan qurulması içün para çekmege imkân berecek bir plandır. Strategiya, Şirketler birligi para berüv fondunıñ teşkil etilüvi, arbiy-siyasiy telükeler sigortası, oquv programmaları, işsizlik seviyesiniñ eksiltilüvi kibi müim teşebbüslerniñ kerçekleştirilmesini közde tuta. Bücet parasınıñ halqara yardım ve şahsiy yatırımlarnen birleştirilüvi, Donbassqa muvafaqiyetli bölgege çevirmege imkân berecek.