UkrAgroKonsalt şirketi, Lugansk vilâyetindeki Şçastâ, Starobilsk, Bilokurakine, Troyitsâ ve Novoaydar territorial cemiyetlerinde çalışqan köy hocalığınıñ toprağınıñ agrohimik pasportını yapmaq içün suv ve topraq nümünelerini toplamağa başladı.

Bundan ğayrı, alimler, semereli köy hocalığınıñ mahsulatınıñ asranması ve iklim deñişmelerine ziraatçılıq sistemalarınıñ uyğunlaştırılması içün qullanılacaq suvaruv sistemalarını ğayrıdan qurmaq ve olarğa hızmet etmek içün soñki areketler yapmaq içün vilâyetteki suvaruv kanallarınıñ inventarizatsiyasını keçirdiler.

“Lugansk vilâyetiniñ kontrolı astında olğan suvaruv topraqlarınıñ umumiy meydanlığı 17,3 biñ gektardır. Amma RF silâlı tecavuzı neticesinde regionda suv septirgen maşnalarnıñ, tulumba stantsiyalarınıñ köçüricileriniñ, boru telleriniñ hırsızlanması, ve olarnıñ satılması sebebinden suvaruv topraqlar az qaldı. Tek 1,7 biñ gektar qaldı, amma bu, mevcut olğan meydanlıqtan on qat azdır. Suvaruv sistemasınıñ ğayrıdan qurulması, reqabetke qabiliyetli olmaq içün çiftçilerge qurğaqlıqnen ve sam yelinen iklim deñişmelerine uyğunlaşmağa imkân berecek“, – dep UkrAgroKonsalt şirketiniñ vekili Olga Morozova ayttı.

UkrAgroKonslat şirketi,  “Şarqiy Ukraina: qavuştıruv, yañıdan quruv, ğayrıdan yaratuv” (3V leyhası) leyhasına yardım etmek maqsadınen Lugansk vilâyetinde iklim optimizatsiyalaştırılğan köy hocalığınıñ yaratılmasına dair araştırma yapacaq. Araştırma, Ukrainadaki barışıq inkişafı ve ğayrıdan tiklevi ortaqlarınıñ maqsat fondunen işdeşlik çerçivesinde yapılacaqtır.

Şirketiniñ ekspertleri, regiondaki suvaruv sistemalarını tedqiq etmek, topraqlarnıñ kompleks talilini yapmaq, vilâyetteki suvaruv sistemalarınıñ geofezaiy haritalaştırılması içün malümatnı toplamaq, iklim deñişmelerinen bağlı bilgilerni ve tehminlerni, hususan yağanaqlar, sıcaqlıq ve topraq suvunıñ derecesini talil etmek, Lugansk vilâyetindeki agroistisalcılar içün kelecek iklim deñişmeleri ve vilâyetteki köy hocalığına tesir esabınen öz biznesini nasıl planlaştıracağına dair tevsiyelerni azırlamaq kerekler.

UkrAgroKonsalt şirketi 1994 senesinden çalışmaqta ve biznes planlaştırmasına, agroistisal ukrain bazarınıñ tehnikiy-iqtisadiy esaslanması ve tahmin etilmesine dair tevsiye etmektedir. 3V leyhası içün araştırma çerçivesinde UkrAgroKonsalt, Ukraina AİMAnıñ Suvarılğan ziraatçılıq institutınen ve “Praym Lab Tek” SMŞnen konsortsiumda çalışacaq.