Ükümetniñ, bu cümleden Ukrainanıñ vaqtınca işğal etilgen topraqlarınıñ reintegratsiya meseleleri nazirliginiñ çezmege tırışqanı müim meselelerden biri, gumanitar koridorlarnı teşkil etüvdir. Umumiy ukrain telekanallarınıñ malümat marafonınıñ canlı yayınında Vitse-baş nazir – Ukrainanıñ vaqtınca işğal etilgen topraqlarınıñ reintegratsiya meseleleri naziri İrina Vereşçuk bunı bildirdi.

​Onıñ sözlerine köre, şimdi Ukrainada bir qaç sıcaq noqta bar, o yerlerden eñ acele tarzda qadınlarnı, balalar ve qartlarnı alıp çıqmaq kerek. Bu, birinciden, Mariupol, Herson, Kıyıv ve Zaporijjâ vilâyetlerindeki bir qaç meskün yerlerden. Gumanitar koridorlar, birinciden insanlarnı qurtaruvdır.

​«Niayet Qırmızı Haçnıñ Halqara eyyetine ve başqa bir qaç teşkilâtlarğa müracaatlarımız ve duyuldı», – dep nazirlikniñ reberi haberdar etti.

Onıñ malumatına köre, Ukraina baş naziri Denıs Şmığalnıñ Cenevredeki teşkilâtnıñ başı Peter Mayyernen lafı oldı. Taraflar, Qırmızı Haçnıñ bitaraf vastalığı ve Rusiyeniñ yaratılğan tahliye kanallarını ateşke tutmama kefaleti aqqında añlaştılar.

​«Qayd etmek kerek ki, grajdan ealini tahliye etmek içün tamam gumanitar koridorlarnı teşkil etmege isteymiz. Laf, tek qadınlar ve balalar aqqındadır. Bunı qayd etem, çünki Rusiye bu mananı aldatıp idare ete ve 2014-2015 ss. İlovaysk ve Debaltseve astında vaqialarğa istinaf ete. O vaqıt bizim askerlerimiz “yeşil” koridorlar vastasınen çıqarıla edi», – dep İrina Vereşçuk ayttı.

​Müessiseniñ reberiniñ fikrine köre, ukran şeerleri ve qasabalarını viran etken, tınç yaşağan ealini öldürgen ve olarğa qarşı terror yapqan rus işğalcileriniñ biñlerce bedenlerini berüv, Ukrainada kerçekten ne olğanını eñ yahşı tarzda kösterecek.

«Rusiye Federatsiyasınıñ halqına, rus askerleriniñ analarına ve olarnı beklegen er keske bu cenk aqqında aqiqatnı bildirmege isteymiz», – dep İrina Vereşçuk añlattı.