Fevar ayınıñ 16-sında profil eyyetiniñ oturışında halq mebuslar tarafından bir reynen tasdıqlanğan «Donetsk ve Lugansk vilâyetleriniñ prioritetli inkişaf topraqlarında iqtisadiy faaliyet mahsus rejimini kirsetüv aqqında» №6403 qanun leyhası, muzakere vaqtında biznes cemaattan yüksek baa aldı.
Belli olğanı kibi, Ukraina Vitse-baş naziri – Ukrainanıñ vaqtınca işğal etilgen topraqlarınıñ reintegratsiya meseleleri naziri İrina Vereşçuk, bu sene yanvar ayında Krematorsk şeerinde №6403 qanun leyhasınıñ mesleat muzakereleriniñ teşebbüsçisi oldı.
«Ukrainanıñ başqa vilâyetlerinde kibi yaşamaq ve çalışmaq. Para qazanmaq ve telükesizlik duymaq. Şimdi Donetsk ve Lugansk vilayetleriniñ sakinleriniñ tamam buna ihtiyacı bar. Mütehassıslar tarafından azırlanğan, Ükümet tarafından tasdıqlanğan Bölgeniñ iqtisadiy inkişaf strategiyası ve onı yerine ketirmege temin etken qanunlar, mında muvafaqiyetli biznes yapmaq ve iş yerleriniñ sayısını artırmaq ve yaşayış şaraitini yahşılaştırmaq içün daa yahşı imkânlarnı yaratacaq. Vazifemiz, cenkniñ deşetli neticelerinde zarar körgen cemiyetlerniñ inkişafı içün imkânlar bermektir. Mebus korpusınıñ, bölgeniñ iqtisadiy inkişafını ğayrıdan tiklemege yönelgen teşebbüslerini desteklegeninden eminim», – dep İrina Vereşçuk bildirdi.
Vesiqanıñ, yañartmalarnı bölgedeki cemaatnıñ inkişaf kerçek modelleri olaraq teklif etkenini qayd etemiz. Bu cümleden:
- Donetsk ve Lugansk vilâyetlerinde üç seviyede (territorial, işğal etilgen topraqlarğa yaqın cemaat seviyesi ve sanayı parkları) iqtisadiy faaliyet mahsus rejimlerinen prioritetli inkişaf topraqlarını (PİT) yaramtağa imkân olacaq,
- içtimaiy teşebbüsler, müim astyapı leyhaları, bölgede arbiy-siyasiy telükelerni sigorta yapmaq içün devlet, donor ve kredit paralarını çekecek Konsotsium para berme fondunı teşkil etilecek.
Daa mezkür vesiqa PİTnda idare organlarını ve olarnıñ vazifelerini, bu cümleden PİTnı idare etme meseleleri icraiy akimiyetniñ merkeziy organınıñ faaliyetiniñ uquqiy esaslarını tesbit ete.
Donetsk ve Lugansk vilâyetleriniñ iqtisadiy inkişaf strategiyası çerçivesinde azırlanğan «Donetsk ve Lugansk vilâyetleriniñ prioritetli inkişaf topraqlarında iqtisadiy faaliyet mahsus rejimini kirsetüv aqqında» qanun leyhasınıñ Ukraina Vitse-baş naziri – Ukrainanıñ vaqtınca işğal etilgen topraqlarınıñ reintegratsiya meseleleri naziri İrina Vereşçuknıñ ve parlamentniñ profil eyyetiniñ reberleriniñ semereli işi yardımınen 2021 s. dekabr ayınıñ başında Yuqarı Şurada qayd etilgenini hatırlatamız.