burger

“Donetsk ve Lugansk vilâyetlerindeki iqtisadiy faaliyet mahsus rejimi bölgeni yatırımlar içün açar”, – Pavlo Kozırev

Опубліковано 17 February 2022 року, о 8:06

Fevral ayınıñ 16-sında Çarşenbe künü Dmıtro Lubinetsniñ reberliginen Donetsk, Lugansk vilâyetlerinde ve Qırım Muhtar Cumhuriyetinde, Aqyar şeerinde insan aqları, vaqtınca işğal etilgen topraqlarınıñ deokupatsiya ve reintegratsiya meseleleri eyyetiniñ, halqara azlıq ve halqlar arası munasebetler eyyetiniñ oturışı keçti. Oturış vaqtında Ukraina halq mebusları bir reynen «Donetsk ve Lugansk vilâyetleriniñ prioritetli inkişaf topraqlarında iqtisadiy faaliyet mahsus rejimini kirsetüv aqqında» №6403 qanun leyhasını tasdıqladılar.

Ukrainanıñ vaqtınca işğal etilgen topraqlarınıñ reintegratsiya meseleleri naziriniñ muavini Pavlo Kozırev, mezkür vesiqanı tasdıqlamaları içün Ukraina halq mebuslarına teşekkür bildirdi.

«Qanun leyhasını beklengen tasdılma, cebege yaqın rayonlarda yaşağan ve çalışqan insanlar içün deñişmeler ve imkânlarğa bir adımdır. Onıñ tasdıqlanması yardımınen iş yerleriniñ sayısını artırmağa, yañı müessiselerni teşkil etmege, em de mevcut olğanlarnı inkişaf etmege ve yañartmağa, energetika tabiligini eksiltmege, ve eñ müim olğan yatırımlarnı çekmege imkân olacaq», – dep qayd etti.

Donetsk ve Lugansk vilâyetleriniñ iqtisadiy inkişaf strategiyası çerçivesinde azırlanğan «Donetsk ve Lugansk vilâyetleriniñ prioritetli inkişaf topraqlarında iqtisadiy faaliyet mahsus rejimini kirsetüv aqqında» qanun leyhasınıñ, Ukraina Vitse-baş naziri – Ukrainanıñ vaqtınca işğal etilgen topraqlarınıñ reinetgartsiya meseleleri naziri İrina Vereşçuknıñ ve parlametniñ profil eyyetiniñ reberleriniñ semereli işi yardımınen 2021 s. dekabr ayınıñ başında Yuqarı Şurada qayd etilgenini hatırlatamız.

Vesiqanıñ esapqa alacağı esas yañartmalar arasında:

  • Donetsk ve Lugansk vilâyetlerinde üç seviyede (territorial, işğal etilgen topraqlarğa yaqın cemaat seviyesi ve sanayı parkları) iqtisadiy faaliyet mahsus rejimlerinen prioritetli inkişaf topraqlarını (PİT) yaramtağa imkân olacaq,
  • içtimaiy teşebbüsler, müim astyapı leyhaları, bölgede arbiy-siyasiy telükelerni sigorta yapmaq içün devlet, donor ve kredit paralarını çekecek Konsotsium para berme fondunı teşkil etilecek.

№6403 qanun leyhası, halqara yatırımcılarnıñ artıq yatırım yapmağa qorqmağanı, cenk sebebinden zarar körgen topraqlarında yañartuv iqtisadiyatını tiklemege yol açacaq. Bu sene yanvar ayında Kramatorsk şeerinde Ukraina Vitse-baş naziri – Ukrainanıñ vaqtınca işğal etilgen topraqlarınıñ reintegratsiya meseleleri naziri İrina Vereşçuknıñ teşebbüsi olğan muzakere vaqtında vesiqa, biznes cemaatnıñ yüksek baa aldı. Açıq muzakere vaqtında mezkür qanun leyhasını desteklemege kerekligini cemiyet teşkilâtlarınıñ vekilleri de bildirdiler.

Donetsk ve Lugansk vilâyetleriniñ zarar körgen topraqlarında munasip yaşayış ve iş şaraitini ğayrıdan tiklemek – em devlet, em biznes, em de bölgeniñ sakinleri içün orta bir qarşılıq. Birlikni talap etken qarşılıq – fevral ayınıñ 16-sındaki tek bir bayram degil, er kündeki areketler ve qararlardır.