Ukraina Yuqarı Şurası «Ukraina ortodoks kilsesiniñ Qırım yeparhiyasınıñ dünyabaqış ve din serbestlik aqlarını qorçalama ve Aziz aynı apostollı Volodımır kinaz ve Olga knagina katedral kilsesiniñ binasını saqlama bazı meseleleri aqqında» qararnı tasdıqladı. Mezkür qararnı fevral ayınıñ 17-sındaki oturışta 271 halq mebusı desteklesi.

Bu qarar, Qırım MCniñ mülkünden devlet mülküne UOKniñ Qırım yeparhiyasınıñ baş ibadethanesiniñ yerleşkeni mülk kompleksini – Aziz aynı apostollı Volodımır kinaz ve Olga knagina katedral kilsesini bermege esapqa alır.

Bundan ğayrı, Ukrainanıñ vaqtınca işğal etilgen topraqlarınıñ reintegratsiya meseleleri naziriniñ muavini İgor Yaremenkonıñ sözlerine köre, mezkür vesiqanı tasdıqlama, Qırım yarımadasındaki Ukraina Ortodoks kilsesiniñ cemiyetiniñ bozulğan aqlarını ğayrıdan tikleme ceryanını başlatmağa imkân berecek, halqara makemelerde qorçalamağa yardım etecek ve halqara cemaatnıñ Ukrainanıñ bütün vaqtınca işğal etilgen topraqlarındaki diniy cemaatnıñ meselelerine diqqatını celp etecek.

Mezkür qararnıñ, ukrain parlamentiniñ RFnıñ işğal akimiyetiniñ mezkür mülk kompleksini RFnıñ qanunsız organlarınıñ mülküne «berüvge» dair areketlerine bir cevap olğanını qayd etemiz.

Böylece, UOKniñ qırım cemaatınıñ qanunlı tarzda mülkünde olğan Katedral kilseniñ binasını ve başqa binalarnı basıp alaraq ve qıymetli kilseniñ mülküni bozaraq ve viran eterek, RFnıñ maqsadı – işğal akimiyetiniñ talaplarına mücibi qanunsız qayd etüvni yapmağan UOKniñ Qırım yeparhiyasına qarşı repressiyalarnı yapmaqtır.

2014 senensinden devam etken tecavuzcı bir devletniñ böyle qanunsız areketleriniñ, halqara aqnı, bu cümleden – vicdan ve din serbestlik aqlarını ciddiy bozuv ve RFnıñ medeniy zenginliklerni qorçalama saasında halqara-uquqiy mecburiyetni ihmal etme nevbetteki şaatlığı olğanını qayd etemiz.

UOKniñ Qırım yeparhiyasınıñ mülkünden baş ibadethanesini qanunsız alma ınıtıluvı, Rusiye Federatsiyasınıñ Ukraina ortodoks kilsesiniñ imanlılarını, musulmanlarnı, «İyegovanıñ şaatları» ve başqa denominatsiyalarnı quvalavğa dair sistema siyasetiniñ misallerinden biridir.