“Nefes” cemaat teşkilâtı, Halqara ana tili kününe bağışlanğan Qırımtatar tilinde online imlânı dörtünci kere keçirecek. 2022 s. fevral ayınıñ 21-inde saat 18:00de canlı efir “Nefes”niñ FB saifesinden ötkerilecek.

İmlânı belli qırımtatar şairesi ve yazıcısı Seyare Kökçe oquycaq. Teşkilâtçılarnıñ firkince, tedbirniñ esas masqadı, insanlarnıñ bilgi seviyesini teşkermek degil de, umummillet ve halqara derecesinde qırımtatar tiline birdemlikte qoltutuv köstermektir.

Bundan ğayrı, online imlân qırımtatar faalleri, “Nefes” taqımınıñ azaları, volontörları, 2021 senesi sentâbrden apiste bulunğan Nariman Celâl, Asan Ahtem, Aziz Ahtem ve episi siyasiy mabusler em de Qırımda qanunsız taqip olunğan semetdeşlerimizge bağışlana.

İmlânı istegen er kes yaza bilecek. Ukrainanıñ vaqtınca işğal etilgen topraqlarınıñ reintegratsiya meseleleri nazirliginiñ taqımı da, Qırımtatar tilini desteklemek ve inkişaf etmege yardım etmek içün mezkür tedbirge qatılacaq.

Yaşına, milletine ve Qırımtatar tilini bilgen seviyesine baqmadan istegen er kesni imlânı yazmağa çağıramız.

Böyle aktsiyanıñ, Birleşken Milletler Teşkilâtınıñ Baş Assambleyası tarafından 1994 s. dekabr ayınıñ 23-ünde ilân etilgen Dünyanıñ tamır halqlarınıñ tilleriniñ halqara onyıllğınıñ vazifelerine uyğun kelgenini qayd etemiz.