Milliy telekanallarından biriniñ canlı yayınında Vitse-baş nazir – Ukrainanıñ vaqtınca işğal etilgen topraqlarınıñ reintegratsiya meseleleri naziri İrina Vereşçuk, öz doğrudan-doğru vazifelerini yapmağa qatma ve tınç yaşağan ealini Ukrainanıñ arbiy bölgelerinden tahliye etmek içün “yeşil” koridorlarnı teşkil etip olarnıñ olmasını temin etmege yardım etme talaplarınen Milliy Qırmızı Haçqa muracaat etti. Çünki anda gumanitar felâket telükesi bar.

Reintegratsiya nazirliginiñ reberi, şimdi çoq zarar körgen ve viran etilgen tek Severodonetsk ve Volnovaha şeerlerinde degil, başqa bölgelerde de pek çoq meseleniñ olğanını haberdar etti.

“Laf, Volnovaha aqqında olsa: “yeşil” koridor olmasa da, öz quvetleri ve bizge yardım etken insanlarnıñ teşebbüsinen ealiniñ kiçik parçasını tahliye ete bildik. Buna ne içün aktsent yapam? Qırmızı Haç, bitaraf statusına saip olğan ve bütün dünyadaki arbiy çatışmalarda areket etken halqara teşkilât olaraq şimdi öz doğrudan-doğru vazifesini yapmay”, – dep İrina Vereşçuk meseleni añlattı.

Vitse-baş nazir qayd etti: Ukraina pek çoq kere Qırmızı Haçtan, vekilleriniñ halq ögünde çıqış yapmasını talap ete. Olar, mania olğan Rusiyeniñ areketleri sebebinden “yeşil” koridornı temin etip olmasalar, bütün dünya bunı bilmeli.

“Dünya, Qırmızı Haçnıñ öz vazifesini yapa ve Rusiyeniñ tesbit etilgen qaideler ve qanunlarğa mücibi cenkleşkenini tüşüne. Amma bu yañlıştır! Rusiye gumanitar tahliye “yeşil” koridorlarını yaratmağa izin bermey. Neticesinde, Qırmızı Haç, BMTniñ muayyen bölükleri bunı söylemek kerekler. Ve bu şartlarda susmaq büyük bir cinayet demektir!”, – dep Vereşçuk qayd ete.

O qoştı: suv, pampersler, ilâçlarnen cemiyet teşkilâtları da insanlarnı temin ete bilirler. Qırmızı Haçnıñ halqara olaraq tanınğan beyaz bayrağı, mahsus naqliyatı ve dünya cemaatınen bitaraf koridorlar aqqında añlaşmaq içün mandatı bar. Böyle koridorlarda eki taraf areket etmege bitire ve ateş açmay. Be bundan soñ tesbit etilgen halqara aqnıñ standartlarına mücibi tınç yaşağan eali arbiy areketler zonasından tahliye etilir.

“Qırmızı Haçnıñ şimdi ne içün böyle tutqanını bilmeyim. Amma susmayacağımıznı bilem: bütün dünya, bu gumanitar teşkilâtnıñ Ukrainada öz vazifesini yapıp olmağanını bilmeli”, – dep Reintegratsiya nazirliginiñ reberi aktsent yaptı.