Vitse-baş nazir – Ukrainanıñ vaqtınca işğal etilgen topraqlarınıñ reintegratsiya meseleleri naziri İrina Vereşçuk beyan ete ki, RFnıñ tsinizmine baqmadan devletimiz gumanitar koridorlarnı açuvğa dair aytışmalarnı devam etecek.

Bu, pek kerekli bir ceryandır. Çünki şimdi tek Mariupolda yardımğa yalvarğan deyerli 300 biñ insan: qadın, bala, qart bulunmaqtadır, dep memur haberdar etti. Aynı da Kıyıv ve Herson vilâyetlerindedir, Harkiv şeerinde ise qıyın arbiy areketler bölgelerden ketmek içün telükesiz imkânğa er kes beklemektedir.

“Ordular arasında aytışmalar olamaz. Amma gumanitar koridorlar aqqında añlaşmaq kerekmiz. Olarnı alâ daa açıp olmaymız. Faqat buña dünya cemaatını çektik, Qırmızı Haçnıñ Halqara eyyeti daa aktiv şekilde çalışmağa başladı, BMTnıñ vekilligi de qatıldı. Frenkistannıñ prezidenti Markonnıñ Putinge muracaatı kibi şahsiy muracaatlarnı köremiz. Körünip tura ki, Rusiye, öz ordusını yañıdan şekillendirmek, rezervlerni çekmek maqsadınen RF ve Belarusqa gumanitar koridorlar kanallarını qullanmağa istey. Ukrainada bunı añlaylar ve ola bilgen manipulâtsiyalardan vazgeçeler”, – dep İrina Vereşçuk qayd etti. Tahliye tek Ukrainanıñ sıñırlarında ola bilir.

Laf, ealisi tahliyege ihtiyac duyğan bölgelerdeki vaziyet aqqında olsa, o, kritik olmağa devam etmektedir – işğalciler gumanitar koridorlar aqqında añlaşmalarğa riayet etmeyler. Şimdi İrina Vereşçuknıñ malümatına köre, Mariupolde pek qıyın [vaziyet], şeerine yolları deyerli qapalıdır. Keçenlerde işğalci, bu şeer içün azırlanğan ilâçlarnen ve azıq malzemelerinen 8 yük maşnasından ve insanlarnıñ ketirilmesi içün 30 avtobustan ibaret olğan konvoynı ateşke tuttı. Ruslar, gumanitar koridor ve tınç rejimi añlaşmasını nazar-itibarğa almadılar ve Mariupol müim yükni almadı.

“İnsanlarğa gumanitar yardımnı bermek içün Mariupolğa ketmege tırışamız”, – dep İrina Vereşçuk öz sarsılmamazlığını bildirdi.