Bugün, bu saba bildirilgen arbiy areketler olğanı bazı şeerlerniñ ve bölgelerniñ, bu cümleden Kıyıv vilâyetiniñ sakinleriniñ tahliyesi devam etmektedir. Aynı zamanda qamaçavğa alınğan ve muntazam tarzda ateşke tutulğan million ealili Mariupol şeeriniñ sakinleriniñ pek telükeli topraqlardan ketmek imkânı yoqtur, dep Vitse-baş nazir – Ukrainanıñ vaqtınca işğal etilgen topraqlarınıñ reintegratsiya meseleleri naziri İrina Vereşçuk añlattı.

«Mariupol em tahliye, em de gumanitar yük içün tamamınen bloklanğandır, – dep añlattı. – Orihove-Pologe yolunda gumanitar yük yañıdan keri Zaporijjâğa döndi. Mariupolğa ilâçlar ve azıq mahsulatını ketirip olmağanızmıznıñ endi dört kündir».

Memurnıñ sözlerine köre, Rusiye keçenlerde tınç yaşağan ealiniñ tahliyesine ve gumanitar koridorlarnı bermesine dair üstünde alınğan mecburiyetlerni muntazam tarzda boza.

«Bu koridorlarğa çıqqan insanlarnı tinteler, olarnıñ başları üzerinde ateş açalar, zorbalıqnen areket eteler. Halqara aqqa mücibi bu, grajdan ealige qarşı cenk cinayetleridir», – dep İrina Vereşçuk qayd etti.

O haberdar etti ki, Qırmızı Haçnıñ Halqara eyyetiniñ Ukrainadaki arbiy areketler zonasında ğayretleri keçenlerge qadar inandırıcı olmağan edi. Şimdi bu teşkilâtnıñ vekili deñişti – arbiy-çöl şaraitinde, bu cümleden Suriyede iş tecribesine saip olğan bir mütehassıs oldı.

«İşdeşliginiñ yahşılaştırılacağına ümüt etem»,- dep irina Vereşçuk fikrini bildirdi.

Daa o añlattı ki, belli olğanı kibi, Rusiye aynı zamanda BMTna üstüne alğanı mecburiyetlerge raiyet ekeni aqqında malümat bere ve özüni “barıştırıcı” olaraq köstere.

«Bu fitnecilidir! Tecavuzcığa tesir etmek içün halqara cemaatqa muracaat etemiz. Oña qarşı sanktsiyalarnıñ gumanitar koridorlarda tahliyeni bozma mevzusınen “bağlı” olması içün. Çünki bu, halqara qanunlar ve cenk qaidelerini, Cenevre añlaşmasını bozuvdır. Buna acele bir cevapkârlıq olmalı!» – dep İrina Vereşçuk qayd etti.

Tahliyeniñ şu anda gumanitar koridorlardan devam etkeni Kıyıv vilayetiniñ: İripin, Buça, Borodânka, Gostomelniñ sakinlerine bir daqqa coymamaları ve eñ qısa vaqıt içinde tahliye etmeleri ricasınen muracaat etti. «Şimdi insanlarnı azat etmek imkânımız bar, amma vaziyet eminsiz!» – dep İrina Vereşçuk bildirdi.