burger

İrina Vereşçuk: “İnsanlarnı razı olmadan çet devletke çıqarmaq cinayettir”

Опубліковано 25 March 2022 року, о 12:24

Böylece СТБ telekanalınıñ canlı yayınında Ukraina Vitse baş naziri İrina Vereşçuk, grajdanlarnı Mariupoldan rusiyege mecburen çıqarma vaziyetini tefsir etti.

Ruslarnıñ işteksizligi ve sabotajı sebebinden vaziyetniñ yahşılaşmağanını bildirerek gumanitar koridorlarnıñ teşkili aqqında umumiy bir qıymetlendirme yaptı.

“Bugün tek eki gumanitar koridor açıq, – o dep haberdar etti. – Mariupoldan ve Melitopoldan Zaporijjâğa. Ümüt etem ki, eñ azından bugün içün planlanğanlar yerine ketirilir. Şu anda insanlarnen tolu 49 avtobus Vasılivka blok noqtasına kete ve pek ümüt etem ki, bir qaç saat içinde insanlarımız Zaporijjâğa yetecekler”.

Vitse baş nazir, zor vaziyetniñ sebeplerinden birini bildirdi: işğalcilerniñ Mariupollılarnı rusiyege çıqarma niyeti.

“Amma insanlar bunı istemeyler! Çünki, rusiyeniñ tecavuzcı bir devlet olğanını ve taqdirinin şu devlette şübeli olacağını bileler. Hususan rusiye filtratsiya lagerlerini endi yarattı”,– dep İrina Vereşçuk ayttı.

Qırmızı Haçnıñ Halqara eyyetiniñ naazar noqtası bu kontekstte muayyen sualler doğura.

İrina Vereşçuk haberdar etkeni kibi, reberi Piter Maurer keçenlerde moskvanı ziyaret etti. Anda Rostovda bir temsilcilik ofisi açma mevzusında şübeli bir qarar berdi.

“Yani, ukrainalılarğa yardım etmek içün göñülli oldılar, faqat rus tarafından. Bu tür rusiye federatsiyasına koridorlarnı qanuniyleştirgen yañlış siyasiy adımnıñ olğanını tüşünem. Bugün Tış işleri nazirligimizniñ teşkilâtqa bir notnen muracaat etmek ve añlatma ketirmek niyeti bar,”-dep Vereşçuk añlattı. 

Qırmızı Haç Rostovda bir temsilcilik açmağa qarar berse, teşkilâttan insanlarımıznı Ukrainağa qaytarmasını talap etccekmiz, dep İrina Vereşçuk qayd etti.

“Olarnı (insanlarnı) qayd etmek, olarnen körüşmek ve vatanına koridornı teşkil etmek zorundalar“, – dep Vitse baş nazir hulâsa çıqardı.