“Ukraina 24” telekanalınıñ canlı yayınında Vitse baş nazir İrina Vereşçuk inandırdı ki, Mariupolnıñ tınç yaşağan sakinleriniñ tahliye ete bilmeleri içün ukrain akimiyeti mümkün olğan er şey yapa. 

“Şimdi Berdânsktan çıqqan insanlarnen tolu 17 avtobus Vasılivkada bekley. Amma, çoq kere endi olğanı kibi, ruslar olarğa blok noqtasını keçmege yol bermeyler. Faqat, bugün aqşam bu insanlarnıñ Zaporijjâğa ketmeleri içün ne yapacağımıznı bilemiz. Bizni Berdânsktan Mariupolğa yol bermegenleri içün vaziyet daa zordır. 84 kimlometrlik yol şeerciler nasıldır ketmeli. Yete bilgenimiz eñ yaqın yer Berdânsknıñ kirişindeki alqadır. Tamam anda insnalrnı toplap, avtobuslarğa bindiremiz ve bundan soñ 15 blok noqtasını keçip Zaporijjâğa ketemiz”, – dep memur añlattı.

Bazar künü işlegen gumanitar koridorlarnıñ neticelerini evelden añlatqanda İrina Vereşçuk qayd etti ki, Lugansk vilâyetinde bugün ateşler ve işğalciniñ tınç rejimine riayet olmağanı sebebinden olar tek qısmen işledi.

Laf, birinciden Rubijne ve Popasna aqqındadır.

“Amma yavaş-yavaş areket etemiz: vilâyet AGMniñ başı Serhiy Ğaydayğa ve tüm göñüllilerge teşekkür bildirem. Olar qaramanlarımızdır!” – dep Reintegratsiya nazirliginiñ reberi qayd etti.

İrina Vereşçuk, telükesizlikte olmaları içün vatandaşlarına mıtlaqa resmiy gumanitar koridorlarnı qullanmalarını tavsiye etti.

“Eger biz açıq gumanitar kordiornı ilân etsek ve tahliye merkezleştirilgen tarzda keçse, daa telükesiz rayonlarğa ketmek içün vatandaşları bu imkânnı mıtlaqa qullanmalılardır. Çünki birazdan o yoq ola bilir”.

Aynı zamanda memur tavsiye etti – eger resmiy koridorlar olmasa ya da ukrain akimiyetiniñ tasdıqlanmağanı rusiye öz “koridorları”nıñ işlenmesini ilân etse – risk almañız! Şübeli marşrutlarnı qullanmañız. Çünki bu, ayat fiyatlı tuzaqtır.