Vitse baş nazir – Ukrainanıñ vaqtınca işğal etilgen topraqlarınıñ reintegratsiya meseleleri naziri İrina Vereşçuk, aprel ayınıñ 11-inde işlegen gumanitar koridorlarnıñ neticelerini añlattı.

Mariupol ve Bredânsktan Zaporijjağa öz naqliyatı ve tahliye avtobusları vastasınen 3854 kişi keldi.

Olardan:

▪️556-sı – mariupollı;

▪️3298-i – Zaporijjâ vilâyetiniñ (Poloğı, Vasılivka, Berdânsk ve Melitopol) şeerleriniñ sakini.

İşğalciler Berdânsk, Tokmak ve Enerğodardan insanlarnı tahliye etmek içün avtobuslar sutunınıñ Zaporijjâdan keçmesini temin etmek içün üç kündir añlaşmalarnı bozalar. İrina Vereşçuk, olarnı Vasılivkadaki blok noqtasında tutqanlarını haberdar etti.

Aynı zamanda, işğalcilerniñ tınç rejimini muntazam tarzda bozğanlarına baqmadan bugün Lugansk vilâyetiniñ Lısıçansk, Severodonetsk, Rubijne, Kreminna ve Popasna şeerlerinden 500 kişiden ziyade tahliye etildi, o dep qayd etti.