Vitse baş nazir – Ukrainanıñ vaqtınca işğal etilgen topraqlarınıñ reintegratsiya meseleleri naziri İrina Vereşçuk, Salı künü tahliye neticelerini añlattı.

Onıñ malümatına köre, umumen bugün 2 671 kişi tahliye etildi.

Böylece, Mariupol ve Berdânsktan Zaporijjâğa öz naqliyatınen 2343 kişi keldi.

Olarnıñ arasında:

▪️208-i – mariupollı;

▪️2135-i – Zaporijjâ vilâyetiniñ (Poloğı, Vasılivka, Berdânsk ve Melitopol) şeerleriniñ sakini.

Aynı zamanda, insanları Berdânsk, Tokmak ve Enerğodardan tahliye etmek içün Zaporijjâdan çıqqan avtobuslar sutunı işğal odusı tarafından Vasılivkadaki blok noqtasında alâ daa bloklanğandır.

«Avtobuslarnıñ keçmesini farqlı şekillerde açmaq içün fırsatlar qıdıramız»,- dep İrina Vereşçuk haberdar etti.

Daa bugün Lugansk vilâyetiniñ Lısıçanks, Severodonetsk, Rubijne, Kreminna ve Popasna şeerlerinden 328 tınç yaşağan sakinni tahliye etmege becerdik.