İşğalci, Qaza deñizge kirişni tamamınen kontrol etmek içün Ukrainanıñ cenübiniñ esas yönelişlerini ücüm etmege devam ete. Olardan biri – HErson vilâyetidir. RUs orduları bir qaç kün devamında işğal etilgen vilâyetini Ukrainanıñ kontrolı astındaki Mıkolayığa ve diger şeerlerge kiriş-çıqışnı bloklaylar. Muntazam ateşlerden ğayrı, tecavuzcılar kütleviy tarzda aydutlıq ta eteler.

Mayıs ayınıñ 5-inden itibarınen

HERSON VİLÂYETİ

Mında Borodânka ve Mariupol şeerlerinde kibi kütleviy viranelik olmağanına baqmadan azıq mahsulatı, bala aşı, benzin ve sakinleriniñ çoqusınıñ qullanğanı gaz yoqluğı sebebinden çoq meskün yer gumanitar felâket sıñırında buluna.

Hersonlılar eñ çoq yaqar malzemelerinin kifayetsizliginden qıynaylar. Onıñ kifayetsizligi tüm vilâyetinde duyula, 34 meskün yerinde bu mesele pek kergindir. Meskün yerleriniñ deyerli aynı sayısınıñ da ilâclarğa ihtiyacı bar. Bazıda mahsus hastalar içün ilâclar söz sırası olmağan eñ sade ilâclarda yoq.

14 territorial cemaatında pensiya ve içtimaiy ödemeler pek tutula. Sebebi ise naqıt yoqluğıdır. Verhniy Roğaçıqta ise rus işğalcielri “Privatbank”nıñ bölügini de çaypadılar.

Faal arbiy arekerler sebebinden Vısokopilsk territorial cemaatında elektrik, suv ve gaz teminatı yoq. Tüm memuriy binalar viran etildi. İnsanlarğa azıq mahsulatı ve ilâclar yetmey. Acele tahliye kerek.

Vısokopillâ, Arhanhelske ve Knâzivkanıñ 2 biñden ziyade sakini öz başına Ukrainanıñ kontrolı astındaki topraqlarına kete. Kahovka ve Novokahovka territorial cemaatlarınıñ sakinleri de öz evlerinden kütleviy tarzda ayıralar. Er kesniñ çıqmaq imkânınıñ olması içün gumanitar koridor aqqında resmiy bir añlaşma kerek.

Yerli sakinler añlatalar ki, Dnipropetrovsk vilâyetiniñ sıñırına çıqmaq içün duşman Knâzivka ve Mala Şestirnânı ücüm etmege vazgeçmey. Bunıñ içün tüm irişilir silânen ateş aça. Olardan bazıları, bu cümleden, Lübımivkanı, kaseta silâsınen ateş ete.

Keçken bir qaç kün devamında Maksım Ğorkıy, Nadejdivka, Pravidno ve Tomına Balka qasabalarında ya qısmen ya da tamamınen mektep, bala bağçası, şeer şurası binası ve on beş şahsiy ev viran etildi. Tavriyskede ise elektrik teminatı kesildi.

Novovonesenske, Kalınivske ve Osokorivkada da qıyın bir vaziyet. İşğalciler, bu qasabalar vastasınen Ukrainanıñ ortasına ketmege tırışalar, bunıñ içün muntazam ateşler sebebinden mında bir aydır suv, ilâc, ekmek, yağ, elektrik energiyası ve alâqa yoq. Gumanitar yardım ketirilmey.

Skadovskta işğalciler, şeeriniñ ve rayonınıñ qanuniy olmağan başını “tayinlediler”. Qanuniy tarzda saylanğan yerli akimiyet online şekilde çalışmağa devam ete.

Rus tecavuzcıları, yerli ealini repressiya daa çoq eteler. Tâhınka qasabasında sabıq TQO askerlerini apis ettiler. Burhunkada ise kiriş-çıqış tek mahsus izinnen yapıla. Fermacılarğa, ormancılarğa muntazam tarzda basmaq, faalcilerni qorqutmaq ve suniy gumanitar felâket – işğalciler tamam böylece Qırımğa topraq koridorını qurmağa ve olarnen ticaretni tüzetmege tırışalar.

Dercde, Herson vilâyet devlet memuriyetiniñ resmiy Facebook saifesinden ve arbiy memuriyetiniñ reberiniñ resmiy Telegram kanalından alınğan malümat qullanıldı. Vilâyetiniñ toprağında arbiy areketler devam etkeni sebebinden vilâyetiniñ vaziyetini ögrenmek şu anda imkânsız qalır.