Keçenlerde Donetsk vilâyetiniñ Lıman şeerinde rus işğalcileri Ukrainadaki BMX mahsuslaştırılğan yolnen tek ayaqmaşna kompleksini viran ettiler. Olarnıñ niyeti, cebe sıñırını kenişletmek – oña büyük bir qarşılıq kösterilir. Tecavuzcılar açuvlanıp ğadaplanırlar. Mesken evlerni, astyapını, sport ve medeniyet obyektlerini ateşke tutarlar.

Mayıs ayınıñ 30-ından itibatınen

DONETSK VİLÂYETİ

Bu künlerde Avdiyivka, Toretsk, Lıman, Bahmut ve Soledar yanında pek sıcaq edi. Daa işğalciler Bahmut – Lısıçansk qara yolunı muvafaqiyetsiz olaraq zapt etmege tırışırlar. Şu anda o, qomşu Lugansk vilâyetindeki Ukrainanıñ kontrolı astındaki şeerlerni temin etken esas ve tek yoldır. O boyunca sakinler tahliye etilir ve azıq mahsulatı ketirilir. Duşman, anda tınç yaşağan sakinler ketkende de onı ateşke tutar.

Bugün Avdiyivkada rus silâsı tarafından bozulmağan bir bina yoq. tecavuzcılar Lımanğa kirdiler ve yolunda er şey şiddetli tarzda viran eterler: evler, mektepler, hastahaneler, tükânlar ve memuriy binalar.

Soñ derecede zemaneviy bir qaç sport binası şiddetli olaraq bozuldı. Olarnıñ arasında: BMX mahsuslaştırılğan yolnen ayaqmaşna kompleksi, ayaqmaşna bazası ve “Lokomotıv” beden terbiyesi-sport kompleksi. İşletken soñ olar tek 1-2 sene çalıştı.

Volnovaha şeerindeki stadion ve Mariupoldaki “Neptun” olimpiya havuzı da çoq çalışmadı. Bu obyektler 2020 ve 2022 senelerinde “Büyük qurma programmasına mücibi inşaat etildi. 2022 s. rus reketaları ve topları olarnı yoq etti.

Umumen rus tolu masştablı Ukrainağa tecavuzınıñ başlanğıcından berli işğalciler Donets vilâyetiniñ eñ az 30 büyük sport obyektini ya bozdılar ya da viran ettiler. Olarnıñ arasında stadionlar, sport kompleksleri, BGSMniñ sport bazaları, buz arenaları, havuzlar, kürek ve suv-sport bazaları. Eñ çoq Mariupol, Avdiyivka, Bahmut, Volnovaha, Vuhledar, Drujkivka, Konstântınivka ve Pokrovsk şeerlerinde. Ön esaplamalarğa köre zararlarnıñ fiyatı 1,5 mlrd grivnadan ziyadedir.

Keçenlerde rus ordusınıñ Toretsk rayonında şiddetli olaraq ateş açqanından sebep magistral 330kV elektrik yolağında qaza qorunması qoydı. Neticesinde Bahmut ve Kramatorsk rayonlarınıñ meskün yerlerini elektriknen temin etken Merkeziy elektrik ast stantsiyası elektriksiz qaldı. Bunıñ içün Donetsk suv borusınıñ eki filtr stantsiyası aynı zamanda suv teminatını bitirdi. Kramatorsk, Slovyansk, Drujkivka, Konstântınivka, Toretsk ve yanındaki meskün yerler suvsız qaldı.

Işıq kütleviy olaraq yoq olmadan bir qaç kün evel vilâyetiniñ sakinleri arasında bu mümkün olacaq vaqia aqqında ölekler yürsetildi. Tarihı bile bar söylendi. Ve tamam bu kün elektriksizlik neticesinde “Toretska” ve “Tsentralna” ocaqlarında 115 dağcı topraq astında qaldı. Bunıñ içün bu ateşlerniñ planlanğan olğanı añlaşılır. Ruslar Donetsk vilâyetiniñ azat topraqlarındaki astyapı obyektlerine maqsatkâr olaraq ateş açarlar. Olarnıñ maqsadı, insanlarnı qorqutmaq, telâş ve memnüniyetsizlikni tarqatmaqtır.

Ateşler yerlerinde qazacılar ağlarnıñ tahminen yigirmi bozulğan yerini taptılar. Mayıs ayınıñ 29-ında aqşam maalinde şeerlerde ışıq peyda oldı. Şu anda Donetsk vilâyetiniñ 310 meskün yerinde o mevcut olmay. Eñ zor yönelişler arasında Lıman, Avdiyivka, Maryinka, Toretsk, Bahmut ve Velıkonovosılkivsktir.

Bu tür turğun olmağan şartlarda ve toqtamağan ateşler seslerinde yaşamağa dayanmaq pek qıyındır. Bunıñ içün yerli akimiyet, vilâyetiniñ sakinlerini arbiy areketler zonasından çıqmağa çağırmağa toqtamay. Bazıları alâ daa tüşüne, bazıları ise ayatnıñ eñ büyük qıymet olğanını añlap köçmege qarar bere.

Dercde, Donetsk vilâyet devlet memuriyetiniñ resmiy Facebook saifesinden ve resmiy saytından alınğan malümat qullanıldı. Vilâyetiniñ toprağında arbiy areketler devam etkeni sebebinden vilâyetiniñ vaziyetini ögrenmek şu anda imkânsız qalır.