Bugün Cenkni ögrenme institutı (ISW) bir araştırmanı yayınladı ve haber etti ki, rus akimiyeti sürgün etilgen ukrainalılarnı mecburen assimilâtsiya etmege tırışalar ve bunı yapmaq maqsadınen ‘köçkenler’ içün böyle degen ‘adaptatsiya merkezleri’ni yaratalar.

Hatırlatamız ki, işğalciler rfna on biñlerce ukrainanı zornen ketirdiler, Milliy malümat bürosınıñ bilgilerine köre, olarnıñ aralarında eñ az 7 biñden ziyade bala bar.

Tolu miqyaslı tecavuznıñ ilk kününden başlap Ukraina, tecavuzcı bir devletniñ toprağına ketirilgen er bir vatandaşı içün küreşe.

Mart ayında Reintegratsiya nazirliginde habersiz ğayıp olğanlar ve rfna sürgün etilgenler aqqında bilgilerni toplağan Milliy malümat bürosı çalışmağa başladı. Maqbul siciller yaratıldı. Olarnıñ esasında sürgün etilgenlerniñ qaytarılmasına dair iş devam ete. Dost devlerlerniñ diplomatik ve mesleat hızmetleri de qatılalar.

Şu anda Reintegratsiya nazirligi marşrutlarnı işlep azırlay. Olar vastasınen sürgün etilgen ukrainalılar evlerine qaytmaq içün rfdan üçünci ülkelerge kete bilecekler.

«rusiyeniñ tınç yaşağan ealinen yapqanı er şey, – bütün dünyanıñ diqqatını tolu miqyaslı tecavuznıñ ilk künlerinden berli celp etkenimiz halqara  bir cinayettir. Ve cinayetçiler makemege ketirilip cezalandırılacaqtır. İnsannı şeerinden ya da ülkeden bile ayırdırmaq mümkün. Faqat rfnıñ akimiyeti ukrainalılarnı olarnıñ kim olğanlarını unuttıramaycaqlardır. Bütün vatandaşlarımıznı tapıp evine qaytarmağa tırışamız ve er biri içün küreşemiz», – dep Ukraina vitse baş naziri qayd etti.

Hatırlatamız: büyüklerni ya da balalarnı rfna zornen sürgün etme vaqialarını bilseñiz, MMBnıñ 24 saat işlegen mahsus sıcaq hattına 16-48 ya da [email protected] poçtasına haberdar etiñiz. Balalar aqqında DİTI VİYNI devlet portalına da haber bere bilirsiñiz.