Bugün Silâlı tecavuzı neticesinde zarar körgen kişilerniñ ruhiy sağlığını qorçalav ve ruhiy destek etüv meseleleri eyyetler arası koordinatsiya şurasınıñ oturışı keçirildi.

Prezidentniñ qadını Olena Zelenskanıñ teşebbüsinen yaratılğan Ruhiy sağlıq ve ruhiy-içtimaiy destek milliy programması çerçivesinde mezkür tedbir keçirildi.

Koordinatsiya şurasında Prezidentniñ qadını Olena Zelenska, baş nazir Denıs Şmıhal ve vitse baş nazir İrına Vereşçuk iştirak ettiler. SSDTniñ bilgilerine köre, eñ az 8,5 million Ukraina vatandaşı ruhiy-içtimaiy destekke ihtiyac duya bilir. Birinciden – olardan eñ zayıfları: ufaq balalarnen köçip kelgen qadınlar, qart insanlar, öldürilgenlerniñ ve habersiz ayıp olğanlarnıñ, esir ve sürgün etilgenlerniñ aqrabaları, ve esirlikten azat etilgenler ve sürgün etilgenler.

Mayıs ayında Ruhiy sağlıq milliy programması başladı ve bu vaqıt devamında çoq şey muvafaqiyetnen yapıldı. Halqara ortaqlar, ecnebiy ve vatan fonduları, ruhiyat ve psihiatrik saalarındaki mütehassıslarnen işdeşlik yaptılar.

Böylece, Klımentiy Şeptıtskıy adına fondu, Mariya Yefrosinina fondu ve «Sıñırsız ekimler» ile işdeşligi çerçivesinde esirlikten azat etilgen ukrainalılar ve balaları reabilitatsiya kursını ziyaret etip bitirdiler.

«Duşmannıñ epishanelerinde bulunğan, cenk sebebinden evinden ayırmağa mecbur qalğan, aqrabalarını coyğan vatandaşlarımızdan er kes, bütün ömrü boyunca qalacaq balaban ruhiy yara aldı. Bu insanlarnıñ mahsus baquvğa, sıcaqqa, diqqatlı munasebetlerge ihtiyacı bar. Em de mütehassıslarnıñ yardımına. Devlet olar aqqında unutmay. O qadar büyük teşebbüs içün Olena Zelenskağa teşekkür bildirem. O, tek cenkten zarar körgenlerni destek etmege degil, bütün cemiyetniñ sağlıqlı alını saqlamağa da yardımcı olacaq. Biz bu ruhiy stress-testni beraber yaşaycaqmız. Ve ğalebe qazanacaqmız», – dep İrına Vereşçuk qayd etti.