Vitse baş nazir İrına Vereşçuknıñ başlığınen oturışta bu bildirildi. İşğalden azat etilecek topraqlar içün tasil ve tibbiy saalar içün işçiler yedeginiñ sicilini yaratuv ve tolduruv meseleleri muzakere etildi.

Qayd etildi ki, tibbiyetçiler ve tasilcilerniñ çalışaycaqları topraqlarnıñ qısmı 2014 senesinden berli işğal etilgen edi. Anda sağlıq ve tasil sistemaları, sovet standartlarına köre çalışalar. İşğal akimiyeti onı kirsetti. Misal içün, kâğıt vesiqalar alâ daa qullanıla, tibbiy ve tasil ceryanlar raqamlaşmay v.i. 

Aynı zamanda bu vaqıt devamında ukrain Ükümetiniñ köntrol etkeni topraqlarda mezkür eki saada semereli islâat keçirildi. Ülkemiz daa raqamlaştırılğan ola. Ve yañı işte çalışmağa azırlanğanda bunı esapqa almaq kerek.

“İhtisaslı çevik taqım kerek. Bütün ceryanlarnı umumiy devlet seviyesine uyğunlaştıra bilecek bir taqım. Bütün bizim adımlarımıznı diqqatnen ve tafsilâtlıca tüşünmek kerek. Kiçiklerden başlamalımız ve adım-adım er şeyni al etmelimiz”, – dep vitse baş nazir oturışnı bitkende hulâsa çıqardı.