Baş nazir Denıs Şmıhal ve Ülkeniñ Birinci hanımı Olena Zelenskanıñ iştirakinen Silâlı tecavuz neticesinde zarar körgen insanlarnıñ ruhiy sağlığını qorçalav ve ruhiy yardım berüv meseleleri müessiselerarası idare şurasınıñ oturışı keçirildi.

 

Birinci hanımı Olena Zelenskanıñ teşebbüs etkeni Umumiy ukrain ruhiy sağlıq programması çerçivesinde mezkür oturış keçirildi.

 

Anda vitse baş nazir İrına Vereşçuk, nazirlikler, Prezident Ofisi, Dünya sağlıq teşkilâtınıñ vekilleri, halq mebusları ve başqaları iştirak ettiler.

 

Oturışnıñ iştirakçileri, askerler ve veteranlarğa yönelgen prioritetli leyhalarğa diqqat celp ettiler. Yaqın kelecekte bu maqsatlı gruppa, devletten ruhiy tedaviylevge ve ruhiy-içtimaiy destekke ihtiyac duyacaqtır. Ve bu, vatandaşlarnıñ büyük qısmıdır. Misal olaraq, Ukrainanıñ ealiniñ tahminen 30%-i bu veteranlar, aileleriniñ azaları ve yaqın arqadaşlarıdır.

 

Bundan ğayrı, İrına Vereşç nazirliklerni ruhiy sağlıqnen bağlı bütün qararlar ve programmalarnı Nazirler Kabinetiniñ uzurında Ruhiy sağlıq idare merkezinen uyğunlaşmağa çağırdı. Tamam bu platforma, tezce idare etmege, askerler ve veteranlarnıñ ruhiy destegi ve ruhiy sağlığını tüzetüv saasında planlaştırılğan adımlarnı yapmağa imkân berecek.

 

“Bizim idare vazifemiz – veteranlarnıñ cemaatqa semereli integratsiya mehanizmlerini tüşünip çıqarmaqtır”, – dep vitse baş nazir hulâsa çıqardı.

 

Hatırlatamız ki, vilâyetlerde Grajdan ealini destek merkezleri endi teşkil etildi. Olar icra akimiyetiniñ organları, içtimaiy ve göñülli teşkilâtlarnıñ cenkten zarar körgen insanlarnen, şu cümleden veteranlarnen, işdeşliginde ve idareciliginde esas rol oynaycaq.