ČT24 çeh telekanalına intervyu bergende vitse baş nazir İrına Vereşçuk bunı bildirdi. O, Ukrainağa yardım ve destek etken dostane çeh halqına, bu ülkeniñ Prezidenti ve Ükümetine teşekkür bildirdi.

Vitse baş nazir, rusiyeniñ devletimizge qarşı başlatqanı cenkni 1938 senesi Hitlerniñ Sudetı vilâyetini (Çehoslovakiya Cumhuriyetiniñ topraqlarınıñ qısmı) işğâlinen tarihiy tarzda bağladı.

O hatırlattı ki, Hitler Sudetını aneksiya etti ve bunı bölgede yaşağan almanlarnı qorçalav tedbiri olaraq añlattı. Bu vaqia, 2014 senesi Donbastaki cenkniñ başlanğıcınen aynıdır. Aynı zamanda Hitlerniñ topraq ekspansiyası ve Putinniñ tecavuzı, kefalet garantiya etilgen imzalanğan añlaşmalarğa qarşı oldı.

“Çehler, öz tarihınıñ bu qısmını yahşıca hatırlaylar. Bunıñ içün zor vaqıtlarda ukrainalılarğa yardım eteler. Ve biz olarğa pek minnetdarmız. Bu misalde biz açıq-aydın tarzda köremiz ki, Putin – zemaneviy Hitlerdir. Amma Ukrainanen cenk oña ceza bumerangı olaraq qaytacaqtır. Avropa ülkeleri ve bütün serbest dünya bizni sanktsiya mehanizmlerinde ve rusiyeni cezalandırmağa destek etmeliler”, – dep İrına Vereşçuk hulâsa çıqardı.