AB ülkelerinde ve Moldovada vaqtınca qorçalav statusını alğan bizim vatandaşlarımıznıñ tibbiy hızmetlerge irişimini yahşılaştırmaq içün Avropa eyyeti, böyle bücetnen leyhanı başlattı.

EU4Health programmasından para ayırılacaq. Avropa eyyetiniñ saytında bu aqqında haber berdiler.

Teşebbüsniñ maqsadı, ukrainalılarnı qabul etken ülkelerde milliy sağlıq sistemasını yahşılaştırmaqtır. Köçken insanlarğa keyfiyetli tibbiy ve aşılav hızmetlerini almaq imkânını bermektir.

Şu anda Lehistan, Romaniya, Bulğaristan, Macaristan, Çehiya, Latviya, Litvaniya, Estoniya ve Moldovada bulunmağa mecbur olğan bizim vatandaşlarımız aqqında laf etemiz.

Bundan ğayrı, teşebbüske köre, ukrain tibbiyetçileri bulunğanları ülkelerde ihtisasına köre çalışa bilirler.

Bu leyha 2 sene devamında yerine ketirilecek, Dünya Sağlıq Teşkilâtı ve Halqara migratsiya teşkilâtınen beraber Avropa eyyeti tarafından destek etile.