Qara qış ayınıñ 15-inde Jenevrede 2024 senesi içün Ukrainadan ev qıdırğan insanlarnıñ ihtiyaclarına qarşılıqnen bağlı bölge planı ve Ukrainada gumanitar ihtiyaclar ve qarşılıq planı taqdim etilecek. Ukrainadaki BMTnıñ Vekilliginiñ saytında bu aqqında haber berdiler.

BMTnıñ Gumanitar işler idaresi (BMTnıñ Gİİ) ve BMTnıñ Yuqarı komissarınıñ Qaçaqlar meseleleri idaresi (BMTnıñ YKnıñ QMİ) mezkür planlarnı taqdim etecekler.

BMTnıñ bilgilerine köe, rusiyeniñ tolu miqyaslı tecavuzı sebebiden tahminen 6,3 million ukrain vatandaşı ecnebiy ülkelerge ketmege mecbur qaldı.

Bundan ğayrı, cenk sebebinden 2024 senesi Ukrainada 14,6 million insan (ealiniñ tahminen 40%-i) gumanitar yardımğa ihtiyac etecek.

Tedbir vaqtında Bmtnıñ Gumanitar meseleler baş kâtibi/Acele yardım idarecisi Martin Griffits, BMTnıñ Qaçaqlar meseleleri yuqarı komissarı Filippo Grandi, Ukrainada gumanitar idareci Deniz Braun, Ukraina vitse baş naziri İrına Vereşçuk ve ükümetsiz teşkilâtlarnıñ vekilleriniñ iştirakinen eki planğa dair panel muzakeresi ötkerilecek.