Tış işleri nazirligi Halqara cinaiy makemeni rusiye prezidentiniñ sürgün etilgen ukrain balalarına rf vatandaşlığını berüvine dair emrine diqqat celp etmege çağıra. Bu, genotsid alâmetidir.

TİN bu aqqında haber berdi.

Qara qış ayınıñ 4-ünde rusiye prezidenti, “Rusiye Federatsiyasınıñ vatandaşlığı aqqında arizanen hitap ete bilgen vatandaşsız insanlar ve ecnebiy ülkelerniñ vatandaşlarınıñ ayrı kategoriyalarını belgilevi aqqında” emrini imzaladı.

Şu cümleden bu vesiqağa köre, rusiye przidentiniñ ayrı qararınen federal qanunlarnñ talaplarına baqmadan Ukraina vatandaşı olğan öksüz balalar ve ana-babanıñ vasiyliginden marum etilgen balalar, rf vatandaşlığını ala bileler. Ukrain balalarınıñ zoraki bulunğanları rus teşkilâtlarınıñ reberleri rf vatandaşlığı aqqında ariza yollaya bileler.

Tış işleri nazirligi qayd etti ki, böyle “normativ-uquqiy akt” Ukraina qanunları, halqara uquqnıñ qaideleri ve rusiyeniñ tolu miqyaslı tecavuzı vaqtında tecavuzcı bir devletke zoraki sürgün etilgen Ukraina vatandaşı olğan balalarnıñ aqlarını boza.

Bundan ğayrı, müessisede qoştılar ki, böyle degen “gumanitar qoralav” sebebinden rusiye topraqlarına qanunsız sürgün etilgen Ukraina vatandaşı olğan bütün balalar, Ukraina vatandaşlarıdır.