Vitse baş nazir – Ukrainanıñ vaqtınca işğal etilgen topraqlarınıñ reintegratsiya meseleleri naziri İrına Vereşçuk öz Telegram kanalında esirlerniñ nevbetiy deñişmesini haberdar etti. O daa tafsilâtlı ayttı ki, Ukraina Prezidenti Volodımır Zelenskıynıñ emrine köre, arbiy esirlerniñ nevbetiy, dörtünci, deñişmesi olacaq.

«5 zabitni ve 17 adiy askerni deñiştirecekmiz, – o dep yazdı. – Daa 8 garjdan kişi, bu cümleden 1 qadın, azat etildi. Umumen bugün 30 vatandaşımız evine keleler».

Deñişme, Milliy malümat bürusınıñ (MMB) faaliyeti çerçivesinde Ukraina Prezidentiniñ emrini yerine ketirmek içün kerçekleşir.

Hatırlatayıq ki, MMB, Ukrainanıñ halqara gumanitar uquqqa riayet etme mecburiyetlerini, hususan 1949 s. avğust ayınıñ 12-sindeki Arbiy esirlernen tutma aqqında Cenevre şartnamesini yerine ketirmek içün teşkil etildi. MMBnıñ Ukrainada esas maqsadı, eki taraftan arbiy esirler ve öldürilgen askerler aqqında malümatnı toplamaq, merkezleştirmek ve umumiyleştirmek ve silâlı tecavuz neticesinde zarar körgen tutulğan grajdanlar, habersiz ğayıp olğanlar, mecburen ketirilgenler (sürgün etilgenler) kibi ukrain vatandaşları aqqında malümatnı toplamaq.

MMB, rf askerleriniñ esirlikke alınması aqqında malümatnıñ, bitaraf bir aracı olğan Halqara Qırmızı Haç eyyetiniñ (HQHE) Merkeziy qıdırma agentligine (MQA) merkezleştirilgen berilmesini teşkil eter. HQHEniñ MQA vastasınen rfnda tutulğan ukrain vatandaşları aqqında malümat qıdırmağa ve toplamağa teşebbüs etmek imkânı da qullanılır.